Stjórn VM mótmælir kvótafrumvarpinu harðlega

Stjórn VM-Félags vélstjóra og málmtæknimanna mótmælir harðlega fyrirhuguðu frumvarpi um breytingar á lögum um stjórn fiskveiða. Með fyrirhuguðum breytingum á að taka aflaheimildir frá undirstöðufyrirtækjum í sjávarútvegi. Það mun rýra afkomu þeirra og stöðuleika, með ófyrirsjáanlegum afleiðingum.

Þetta kemur fram í ályktun sem stjórn VM hefur sent frá sér. Þar segir einnig að vandamál byggðarlaga sem eiga undir högg að sækja verður að leysa með öðrum hætti en að skerða lífskjör almennings til framtíðar. Stjórnvöld verða að sætta sig við þá staðreynd að sjávarútvegur verður ekki rekinn frá hverri höfn sem til er hringinn í kringum landið.

„Sjávarauðlind okkar er takmörkuð og því eru takmörk fyrir því hvað hægt er að deila henni út á marga, til nýtingar með þjóðhagslega hagkvæmni að leiðarljósi. Í umsögnum sínum um síðustu lagafrumvörp vegna breytingar á lögum um stjórna fiskveiða, hefur VM margoft bent á að sjávarútvegur er orðinn hátækni atvinnugrein og vegna samkeppnissjónarmiða er ekki hægt að rýra afkomu greinarinnar frekar," segir í ályktuninni.

„Stjórnvöld og samfélagið verða að horfast í augu við breytta atvinnuhætti í sjávarútvegi. Vandamál byggðarlaga sem eiga undir högg að sækja verður að leysa með öðrum hætti en að skerða lífskjör almennings til framtíðar. Stjórnvöld verða að sætta sig við þá staðreynd að sjávarútvegur verður ekki rekinn frá hverri höfn sem til er hringinn í kringum landið."