Loftsteinaslysið einstæður atburður

Fimmhundruð hið minnsta slösuðust þegar lofsteinum ringdi yfir þrjár rússneskar borgir í morgun. Þetta er í fyrsta sinn í sögunni sem fólk hlýtur skaða af slíku fyrirbæri segir stjörnuáhugamaður.

Mikil skelfing greip um sig þegar röð af sprengingum sást á himni í grennd við borgirnar þrjár sem eru í Úralfjöllum um 1500 kílómetra austur af Moskvu. Sprengingarnar stöfuðu frá loftsteinahríð sem skall á svæðinu en þær voru svo háværar og öflugar að þær líktust þrumum og jarðskjálftum. Um fimmhundruð og tuttugu slösuðust og flestir þegar þeir urðu fyrir glerbrotum þegar rúður brotnuðu. Á meðal hinna slösuðu eru börn en svo virðist sem enginn hafi hlotið alvarleg meiðsli.

Einn loftsteinanna skall til jarðar í grennd við zinkverksmiðju í einni borginni og sló allt netsamband og farsímasamband út á stóru svæði. Þá mun rafmagn einnig hafa slegið út öðrum svæðum. Sævar Helgi Bragason formaður stjörnuskoðunarfélags Seltjarnarness segir að lítið sé vitað um fyrirbærið á þessari stundu.

„Sem betur fer er þetta sjaldgæft og þetta er í fyrsta skipti í sögunni sem maður heyrir af fólki slasast af völdum lofsteina. En þetta er eitthvað sem getur alltaf gerst og við þurfum bara að vera á vaktinni og fylgjast vel með," segir Sævar Helgi.

Dagurinn í dag er sannkallaður lofsteinadagur því einn slíkur svífur nú hratt í átt að jörðu og mun fara fram hjá henni um klukkan hálf átta í kvöld. Lofsteinahrinan í Rússlandi er þó ótengd því fyrirbæri segir Sævar Helgi.

„Sá steinn heitir 2012DA14 og hann er svona ca. 45 metrar í þvermál eins og hálfur fótboltavöllur. Þannig að hann er ansi stór og stæðilegur en enginn risi þannig séð. Þetta er engu að síður stærsti steinninn sem við höfum vitað af og séð fara fram hjá jörðinni í jafn lítilli hæð eins og hann gerir í kvöld. En er engin hætta á að hann rekist á jörðina? Það er engin hætta sem betur fer á að hann rekist á jörðina því á yrði skaðinn virkilega mikill. Þá myndi myndast gígur sem væri kannski 500 m til 1 km í þvermál. En sem betur fer þá er hæðin alltof mikil til að hann geti einhverntímann valdið skaða," segir Sævar Helgi Bragason formaður stjörnuskoðunarfélags Seltjarnarness