Jón Bjarnason íhugar sérframboð

„Þessar áskoranir eru nú orðnar það margar að líkurnar hafa aukist á sjálfstæðu framboði. Ég mun taka ákvörðun um þetta á næstunni og tilkynna það strax og hún liggur fyrir," segir Jón Bjarnason í samtali við Vesturlandsvefinn Skessuhorn.

Ráðherrann fyrrverandi og þingmaður Vinstrihreyfingarinnar græns framboðs segir að margir hafi leitað til sín og hvatt hann til framboðs sem komi vissulega til greina.

„Eins og margoft hefur fram komið hef ég staðið fyrir þeirri stefnu sem Vinstrihreyfingin grænt framboð boðaði fyrir kosningarnar 2009 og hvergi kvikað frá henni," segir Jón í samtali við Skessuhorn. Komi til sérframboðs muni hann leggja áherslu á sömu grunngildi og hingað til, þ.e. andstöðu við inngöngu í Evrópusambandið, almenn velferðarmál og málefni landsbyggðarinnar.

„Þetta mun hins vegar allt skýrast á næstu dögum," segir Jón.