Hótar Vinstri grænum málsókn

Heimir Hannesson krefur Vinstri hreyfinguna grænt framboð um afsökunarbeiðni og greiðslu miskamóta vegna meiðyrða í fyrirsögn og efnisgrein sem birtist í grein á Smugunni 15. febrúar síðastliðinn.

Ummælin varða mál sem kom upp innan Stúdentaráðs í byrjun febrúar þegar tilkynning birtist á vef ráðsins þar sem fram kom að starfsmenn Stúdentaráðsins hefðu þurft að endurgreiða rúma hálfa milljón vegna úttektar á bensínkorti stúdentaráðsins. Í upprunalegu tilkynningunni sagði orðrétt:

„Vegna mistaka við útgáfu kortanna var starfsmönnunum unnt að fara framyfir umsamda upphæð sem þáverandi framkvæmdastjóri og hagsmunafulltrúi ráðsins gerðu vísvitandi í eigin þágu en fjárhæðin sem á kortin safnaðist var í heildina rúmlega hálf milljón króna."

Þar sem hægt var að túlka setninguna „vísvitandi í eigin þágu" sem fjárdrátt var önnur tilkynning send á fjölmiðla skömmu síðar þar sem það var áréttað að ekki væri um fjárdrátt að ræða. Smugan vitnaði aftur á móti í grein sem birtist hér á Vísi og spurði í fyrirsögn: „Háskólanemi spyr hvaða lærdóm megi draga af fjárdrætti í stúdentaráði Háskólans"

Heimir er ósáttur við notkun Smugunnar á orðinu „fjárdráttur" í þessu tilviki og hefur því falið lögmanni sínum, Vilhjálmi H. Vilhjálmssyni að krefja Smuguna um afsökunarbeiðni og greiðslumiskabóta.

Í ljósi þess að greinin var ekki merkt höfundi þá er kröfum beint að ábyrgðaraðila lénsins og eins af aðaleigendum Smugunnar, sem er stjórnmálaflokkurinn VG.

Sjálfur hefur Heimir leitast eftir því að sinna trúnaðarstörfum fyrir Sjálfstæðisflokkinn en hann bauð sig fram til formanns Heimdallar á síðasta ári.

Hann dró framboðið hinsvegar óvænt til baka og sagði í viðtali við RÚV í lok júlí árið 2012 að kosningasvik og leðjuslagur einkenndu meðal annars ungliðahreyfinguna í Sjálfstæðisflokknum.

Ekki kemur fram í kröfunni hvort Heimir hafi verið annar starfsmaðurinn sem þurfti að endurgreiða féð aftur til stúdentaráðsins - eða er fjallað um í greininni - en sá var aldrei nafngreindur í umfjöllun fjölmiðla um málið.