Tvær flugur í einu höggi

Fjáröflunarátakið „Út að borða fyrir börnin“ hófst á föstudag og stendur til fimmtánda mars. Sextán veitingastaðir hafa ákveðið að styðja verkefni Barnaheilla. Á tímabilinu rennur hluti af verði valinna rétta á þessum stöðum til verkefna sem stuðla að vernd barna gegn ofbeldi.

„Þetta er í þriðja sinn sem átakinu er hrundið af stað. Á síðasta ári tóku þrettán veitingastaðir þátt en nú eru þeir sextán talsins. Þetta eru veitingastaðirnir Caruso, Culiacan, Dominos, Grill 66, Hamborgarafabrikkan, Íslenska kaffistofan, KFC, Nauthóll, Nings, Pizza Hut, Rossopomodoro, Serrano, Skrúður, Strikið á Akureyri, Subway og Taco Bell," segir Erna Reynisdóttir, framkvæmdastjóri Barnaheilla - Save the Children á Íslandi.

Tvær flugur í einu höggi

„Markmiðið með átakinu er tvíþætt. Annars vegar að afla fjár í verkefnin okkar og hins vegar að stuðla að samverustundum fjölskyldunnar en rannsóknir sýna að reglulegar samverustundir með fjölskyldu minnka líkur á áhættuhegðun hjá börnum.

Meira um þetta mál og annað tengt Barnaheillum má lesa í kynningarblaði sem Barnaheill gaf út og fylgdi Fréttablaðinu í dag.