Þór Saari leggur fram vantrauststillögu á ríkisstjórnina

Á þriðjudaginn mun Alþingi kjósa um vantraust á hendur ríkisstjórn Íslands, samkvæmt tilkynningu frá Þór Saari, þingmanni Hreyfingarinnar.

Þór lagði vantrauststillöguna fram í dag. Ástæðan er sú að ríkisstjórnin getur ekki afgreitt frumvarp til stjórnarskipunarlaga byggt á þeim drögum sem samþykkt var að leggja til grundvallarnýrri stjórnarskrá og samþykkt voru með yfirgnæfandi meirihluta í þjóðaratkvæðagreiðslu í október í fyrra.

„Lýðræðisumbætur sem lofað var í aðdraganda kosninga hafa ekki séð dagsins ljós og enn er við lýði ójafn kosningarréttur eftir landshlutum, ójafnrétti í fjármálum stjórnmálaflokka og skortur á persónukjöri og beinu lýðræði.

Með hliðsjón af því grundvallaratriði í lýðræðisríkjum að allt vald komi frá þjóðinni virðist ríkisstjórnin ganga í berhögg við augljósan vilja þjóðarinnar um nýja stjórnarskrá. Slíkri ríkisstjórn er eðli málsins samkvæmt ekki stætt að vera við völd. Lagt er til að fram að kjördegi sitji starfsstjórn skipuð fulltrúum allra flokka á þingi í stað þess að fráfarandi stjórn sitji sem starfsstjórn fram að þeim tíma. Með því eru meiri líkur á að sátt náist um mál sem varða hagsmuni þjóðarinnar," segir í greinargerð um málið.

Tillagan verður tekin fyrir á Alþingi á þriðjudaginn, að sögn Þórs. Ef tillagan verður samþykkt verður þing rofið eigi síðar en 28. febrúar næstkomandi og efnt til almennra þingkosnina 13. apríl næstkomandi. Fram að kjördegi sitji starfsstjórn skipuð fulltrúum allra flokka á þingi.