Atkvæðagreiðslan verður spennandi

Líf ríkisstjórnarinnar getur ráðist af hjásetu Guðmundar Steingrímssonar formanns Bjartrar framtíðar eða atkvæði hans gegn vantrausttillögu Þórs Saari, því ríkisstjórninina sjálfa skortir eitt atkvæði til að vera með meirihluta á Alþingi.

Staðan á Alþingi er all óvenjuleg því raðir stjórnar og stjórnarandstöðu hafa riðlast nokkuð á kjörtímabilinu. Þau Ásmundur Einar Daðason, Atli Gíslason, Lilja Mósesdóttir og Jón Bjarnason hafa öll yfirgefið Vinstri græna og Róbert Marshall Samfylkinguna og myndað þingflokk Bjartrar framtíðar með Guðmundi Steingrímssyni sem yfirgaf Framsóknarflokkinn.

Snemma á kjörtímabilinu gekk Þráinn Bertelsson úr Borgarareyfingunni sem breyttist í Hreyfinguna og gekk til liðs við Vinstri græna.

Eftir þessar hrókeringar allar var ríkisstjórnin komin í minnihluta með 30 þingmenn og stjórnarandstaðan 33.

Róbert er nú í fríi frá þingstörfum og varamaður hans Anna Margrét Guðjónsdóttir komin inn fyrir hann, en hún er samfylkingarmaður og styður því ríkisstjórnina, sem formlega er því með 31 þingmann og vantar einn til að sitja hjá eða greiða atkvæði gegn vantrausti til að lifa það af.

Guðmundur Steingrímsson formaður Bjartrar framtíðar sagðist í samtali við fréttastofuna vilja ræða þessa stöðu við sína samherja áður en hann lýsti afstöðu sinni til tillögunnar, en benti á að hann hefði setið hjá þegar Bjarni Beneditksson formaður Sjálfstæðisflokksins bar síðast upp vantraust á ríkisstjórnina árið 2011.

Ef hann leikur sama leikin ætti ríkisstjórnin að vera hólpin, en svo þarf ekki að vera.

Þráinn Bertlesson hefur nefninlega lýst því yfir að hann sjái enga ástæðu til að styðja stjórnina komi hún ekki stjórnarskrármálinu í gegn. Hann sagði í samtali við Vísi nú rétt fyrir fréttir að hann muni skoða málið vandlega, en skoðun hans á þessum málum væri óbreytt.

Atkvæðagreiðslan á þriðjudag verður því spennandi.