Skyndihjálpar-app frá Rauða krossinum

„Þetta er skyndihjálpar-app sem við vonumst til þess að sem flestir Íslendingar hafi í símanum sínum. Það getur hjálpað fólki þegar það lendir í aðstæðum þar sem það þarf að beita skyndihjálp,“ segir Þórir Guðmundsson, yfirmaður hjálparstarfssviðs Rauða krossins, um nýtt app sem Rauði krossinn gaf út í síðustu viku.

Appið má nú nálgast í App store og á Play Store. Þar segir að appið veiti aðgang að einföldum leiðbeiningum um allar helstur aðgerðir skyndihjálpar sem nýst geti í daglegu lífi. Með myndböndum, gagnvirkum prófum og einföldum skilaboðum hafi aldrei verið eins auðvelt að læra skyndihjálp. Appið kostar ekkert.

Þórir segir að oftast þegar fólk þurfi að beita skyndihjálp sé það vegna þess að einhver því nákominn þurfi á aðstoð að halda. Þá geti verið mjög gott að hafa appið í símanum til að leiða fólk áfram.

Á appinu er einnig hægt að taka próf þannig að hver og einn getur séð hversu vel hann er að sér í skyndihjálp. Þannig er hægt að sjá hvað megi bæta og slíkt getur komið sér vel ef slys verða. Einnig er hægt að taka prófið hér.

Á næsta ári á Rauði krossinn 90 ára afmæli og af því tilefni ætlar Rauði krossinn á Íslandi að vera með sérstakt átak í skyndihjálp. Útgáfa skyndihjálpar-appsins er hluti af því verkefni. Þórir segir að Rauði krossinn kenni árlega um 7 til 10 þúsuns manns skyndihjálp og minnir á að mikilvægt sé að fólk fari á námskeið á þriggja ára fresti.

„Það er von okkar að appið verði til þess að fólk átti sig betur á því hvað það kann og hvað ekki og einnig að það læri af appinu,“ segir Þórir. „Þannig að miklu fleiri Íslendingar geti á ögurstundu aðstoðað þegar slys verður eða komið í veg fyrir meiri skaða.“