Ósáttir við samskipti við ráðuneytin

Fleiri forstöðumenn ríkisstofnana eru óánægðir með samskipti sín við ráðuneyti nú en árið 2007. Verulega hefur dregið úr ánægju stofnananna með samskipti við fjármálaráðuneytið. Þetta kemur fram í könnun á störfum og starfsskilyrðum forstöðumanna ríkisstofnana, sem var gerð á vegum fjármálaráðuneytisins, Félags forstöðumanna ríkisstofnana og Stofnunar stjórnsýslufræða og stjórnmála við Háskóla Íslands.

„Forstöðumenn virðast vera ósáttir við ýmislegt er varðar samskipti við ráðuneyti. Meðal annars eru þeir ósáttir við undirbúning fjárlaga og almennt virðist að þeir séu ósáttari nú en 2007,“ segir Ómar H. Kristmundsson, prófessor í stjórnmálafræði, en hann var einn þeirra sem unnu að könnuninni. Hann segir þetta athyglisvert með tilliti til þess að miklar breytingar hafi orðið í stjórnarráðinu frá 2007, þegar sams konar könnun var síðast gerð. „Það umrót hefur kannski haft þau áhrif að draga úr samskiptum við stofnanir frekar en hitt.“ Hann segir að það sé væntanlega tímabundin staða.

Tæplega helmingur forstöðumanna var óánægður með samskipti við ráðuneyti sitt vegna undirbúnings fjárlaga. Aðeins einn af hverjum tíu forstöðumönnum heilbrigðisstofnana telur stofnun sína geta sinnt lögbundnum verkefnum miðað við fjárveitingar. 64 prósent þeirra telja stofnunina frekar eða mjög illa geta sinnt verkefnum. Ef litið er til forstöðumanna ríkisstofnana almennt telja 44 prósent þeirra stofnun sína geta frekar eða mjög vel sinnt lögbundnum verkefnum.

Þá telur tæpur helmingur forstöðumanna sig fá nauðsynlegan stuðning frá viðkomandi ráðuneyti. Minnsta ánægjan er meðal forstöðumanna stofnana heilbrigðis-, félags- og lýðheilsumála. Mesta ánægjan er hjá mennta-, menningar- og vísindastofnunum og í fjársýslu tolla- og dómsmála.

Forstöðumennirnir eru almennt ánægðari með það nú en árið 2007 hversu fljótt og vel ráðuneytið svarar erindum þeirra. Aðeins fjórtán prósent forstöðumanna telja sig þó fá endurgjöf á frammistöðu sína frá ráðuneytinu sem þeir tilheyra. „Veruleg breyting til hins verra hefur orðið í flokki sýslumannsembætta, löggæslu og fangelsa eða 44 prósent aukning óánægju milli kannana,“ segir í skýrslunni um endurgjöf. Þá gætir einnig vaxandi óánægju meðal heilbrigðisstofnana. Ómar segir að forstöðumennirnir kalli hreinlega eftir því að frammistaða þeirra verði metin. „Hún er ekki metin með formlegum hætti í dag.“

thorunn@frettabladid.is