Orri: Áhyggjuefni að störfum sé ekki að fjölga

Þrátt fyrir hagvöxt þá er störfum ekki að fjölga, og Íslendingar hafa haldið áfram að leita að nýjum tækifærum á Norðurlöndunum. Það þarf að snúa þessari þróun við og það þarf að fylgjast náið með því hvaða þekking er að fara úr landi, segir Orri Hauksson, framkvæmdastjóri Samtaka iðnaðarins.

Samkvæmt nýjum tölum sem Hagstofa Íslands birti í morgun eru Íslandingar nú 320.660, þar af tæplega 161 þúsund karlar, og lítið færri konur, eða tæplega 160 þúsund. Á þriðja ársfjórðungi, í júlí, ágúst og september, hefur Íslendingum fjölgað um 500.

Á þriðja ársfjórðungi 2012 fæddust 1.230 börn, en 470 einstaklingar létust. Á sama tíma fluttust 280 einstaklingar frá landinu umfram aðflutta. Brottfluttir einstaklingar með íslenskt ríkisfang voru 590 umfram aðflutta, en aðfluttir erlendir ríkisborgarar voru 300 fleiri en þeir sem fluttust frá landinu. Fleiri konur en karlar fluttust frá landinu.

Danmörk var helsti áfangastaður brottfluttra íslenskra ríkisborgara en þangað fluttust 550 manns í júlí, ágúst og september. Til Danmerkur, Noregs og Svíþjóðar fluttust samtals 1.440 íslenskir ríkisborgarar af 1.790 alls.

Orri Hauksson, framkvæmdastjóri Samtaka iðnaðarins, segir að botninum í efnahagssamdrættinum frá hruni fjármálakerfisins hafi verið náð, en það sé samt ástæða til þess að hafa áhyggjur af því að störfum sé ekki að fjölga, þó hagvöxtur mælist á milli tvö og þrjú prósent á árs grundvelli hér á landi.

„Auðvitað er það áhyggjuefni að störfum sé ekki að fjölga, en það er í sjálfu sér jákvætt ef fólk getur farið út fyrir landsteinana og fengið vinnu. En það er vonandi að það fólk skili sér aftur, með umfangsmeiri þekkingu og geti þá komið í ný verkefni. En lykilatriðið er að fjölga störfunum, og byggja hagvöxtinn á því," segir Orri.