Enn margir óvissuþættir

Guðmundur Guðmundsson landsliðsþjálfari valdi í gær átján leikmenn sem hann mun taka með sér á æfingamót í Danmörku sem fer fram nú um helgina. Leikið verður við heimamenn, Pólverja og Slóvena, en síðastnefnda þjóðin er einnig með Íslandi í riðli á Evrópumeistaramótinu sem hefst í Serbíu þann 15. desember næstkomandi.

Guðmundur fær að tilkynna sextán leikmenn í EM-hóp Íslands en nokkrir óvissuþættir eru enn um leikmannahópinn. Snorri Steinn Guðjónsson hefur til að mynda ekkert æft með liðinu í vikunni – hann er enn í Danmörku þar sem kona hans á von á sér. Guðmundur vill því hafa varann á.

„Af þeim sökum hefur Arnór [Atlason] verið mikið á miðjunni og Aron [Pálmarsson] yfirleitt í vinstri skyttunni á æfingum okkar," segir Guðmundur en Ólafur Guðmundsson og Ólafur Bjarki Ragnarsson geta líka leyst þessar stöður. „Vonandi getur Snorri komið eins fljótt og mögulegt er til okkar en þangað til þurfa hinir að vera með sín hlutverk á hreinu."

Að mörgu að huga

Hann segir að flestir leikmenn séu heilir en þeir Ingimundur Ingimundarson og Alexander Petersson gátu þó lítið sem ekkert æft í gær vegna meiðsla. Ingimundur meiddist á nára á fyrstu æfingu landsliðsins í vikunni og Alexander er tæpur vegna meiðsla í öxl. Svo má geta þess að Arnór Atlason lætur sig hafa það að spila þrátt fyrir brjósklos í baki en ljóst að það er að mörgu að huga hjá Guðmundi.

Aron Rafn Eðvarðsson fer út til Danmerkur sem þriðji markvörður en Guðmundur hefur mikla trú á honum. „Hann fer með svo hann kynnist því betur hvernig það er að vera með landsliðinu. Að mínu mati er hann maður framtíðarinnar - ég er reyndar ekki í vafa um það. Þess vegna viljum gefa honum tækifæri," segir Guðmundur. „Vegna þess og stöðu Snorra Steins förum við með átján menn til Danmerkur en ekki sextán."

Hann útilokar ekki að taka sautján leikmenn með sér til Serbíu og halda einu sæti lausu í sextán manna lokahópnum þegar keppnin hefst. „Við verðum bara að meta það út frá meiðslum leikmanna og hvort við viljum eiga fleiri valkosti úti í Serbíu. Álagið er mikið á svona mótum og því gæti það verið góður kostur."

Ánægður með alla leikmennina

Fannar Friðgeirsson og Arnór Þór Gunnarsson eru í æfingahópnum en fara ekki með til Danmerkur. Þeir munu samt æfa áfram með liðinu þegar það kemur heim á mánudaginn. „Ég er mjög ánægður með báða þessa leikmenn og reyndar við alla þá leikmenn sem voru valdir í hópinn. Þeir hafa staðið sig vel á æfingum," segir Guðmundur.

Hann vill að liðið nái vel saman í Danmörku og skili því í leikina sem hafi verið tekið fyrir á æfingum. „Þetta er allt að koma, ég er viss um það. Við viljum líka upplifa að við getum spilað vel og staðið okkur vel svo að menn fái sjálfstraustið í lag. Aðalmálið verður þó að við stöndum okkur vel þegar mótið hefst og það verður ekki heimsendir þótt leikir tapist í æfingamóti. Við töpuðum til að mynda öllum okkar leikjum fyrir Ólympíuleikana í Peking – það er því allur gangur á þessu," sagði þjálfarinn og brosti.