Hækkunin ákveðin án samráðs við verslunareigendur

Samtök kaupmanna og fasteignaeigenda við Laugaveginn í Reykjavík mótmæla harðlega áformum um hækkun bílastæðagjalda í miðborginni sem borgaryfirvöld kynntu í gær. Þar er gert ráð fyrir hækkunum bílastæðagjalda um fimmtíu prósent, auk þess sem til stendur að lengja gjaldskyldu á laugardögum.

Í ályktun sem samtökin sendu frá sér segir að umræddar hækkanir á bílastæðagjöldum hafi verið ákveðnar að því er virðist án samráðs við verslunareigendur og aðra hagsmunaaðila á svæðinu. Þær muni fæla viðskiptavini verslana frá miðborginni og auka enn á þann viðskiptaflótta sem er af svæðinu og hefur verið viðvarandi um langt árabil. Verslun í miðborginni eigi í harðri samkeppni við önnur verslunarsvæði á Stór-Reykjavíkursvæðinu, þar sem aðgengi sé greitt og engin bílastæðagjöld.

„Á tímum almenns samdráttar í smásöluverslun væri rétt að borgaryfirvöld tækju höndum saman með kaupmönnum í miðborginni og stuðluðu að aukinni verslun og mannlífi. Liður í því gæti verið lækkun bílastæðagjalda og fjölgun stæða. Að sama skapi myndi það auðvelda aðgengi að verslunum að fella niður gjaldskyldu á svæðum nærri Laugavegi. Með því móti mætti efla til muna verslun og mannlíf í miðborg Reykjavíkur," segir í ályktuninni.