Pavel og Jakob stigahæstir í sigurleikjum sinna liða

Jakob Örn Sigurðarson og Pavel Ermolinskij voru í aðalhlutverkum í sigrum sinna liða í sænska körfuboltanum í kvöld. Norrköping Dolphins vann 96-79 heimasigur á Borås Basket og Sundsvall Dragons lenti ekki í miklum vandræðum í 106-78 sigri Jämtland Basket.

Pavel Ermolinskij var frábær í sigri Norrköping Dolphins en hann var með 18 stig, 8 fráköst, 5 stoðsendingar og 3 stolna bolta í leiknum og skilaði 31 framlagsstigi til síns liðs. Pavel hitti úr 5 af 7 skotum sínum utan af velli og öllum sex vítunum og tapaði aðeins einum bolta þær 25 mínútur sem hann spilaði.

Jakob Örn Sigurðarson var með 18 stig á 22 mínútum fyrir Sundsvall Dragons og Hlynur Bæringsson var með 11 stig og 5 fráköst. Jakob hitti úr 3 af 5 þriggja stiga skotum sínum í kvöld.