Segir algjöran skort á eftirliti með slitastjórnarmönnum

Guðlaugur Þór Þórðarson, fulltrúi í efnahags- og viðskiptanefnd Alþingis, segir ekkert eftirlit hafa verið haft með launagreiðslum til skilanefnda- og slitastjórnarmanna. Fram hefur komið í fjölmiðlum að undanförnu að laun slitastjórnarmanna, meðal annars þeirra Steinunnar Guðbjartsdóttur og Páls Eiríkssonar í slitastjórn Glitnis, hafi numið tugum milljóna á síðasta ári. Efnahags- og viðskiptanefnd Alþingis fundaði um málið í morgun, að beiðni Guðlaugs Þórs. Hann segir að þrátt fyrir fögur fyrirheit hafi stjórnvöld ekkert beitt sér fyrir því að launin yrðu lækkuð.

Þar vísar Guðlaugur Þór meðal annars í orð Steingríms J. Sigfússonar, þáverandi fjármálaráðherra, sem sagði árið 2010 að hann hygðist beita sér fyrir því að laun skilanefndarmanna bankanna verði lækkuð. Ofurlaun þeirra sendi röng skilaboð út í samfélagið. Þá hafði Fréttablaðið nýlega greint frá því að skilanefndarmenn og slitastjórnendur gömlu bankanna fengu að meðaltali þrjár til fimm milljónir króna í laun á mánuði í fyrra. „Það eru engin rök að það séu ekki tæki til að beita viðurlögum," segir Guðlaugur. Eftirlitið þurfi samt að vera til staðar.

„Það er ekki eins og það vanti umræðuna um þetta. Ég held að enginn geti haldið því fram að það hafi ekki verið umræða um þetta," segir Guðlaugur Þór sem fullyrðir að þeir ráðherrar sem beri ábyrgð á málinu hafi ekki staðið sína pligt.