Loksins sigur hjá Sundsvall | Jakob öflugur

Sundsvall Dragons batt í kvöld enda á fjögurra leikja taphrinu með því að vinna LF Basket, 97-87, í mikilvægum leik í sænsku úrvalsdeildinni í kvöld.

Sundsvall var dottið niður í sjötta sæti deildarinnar en jafnaði nú Solna, sem situr í fjórða sæti, að stigum.

Jakob Örn Sigurðarson var eins og svo oft áður stigahæstur sinna manna en í kvöld skoraði hann 27 stig. Hlynur Bæringsson skoraði tíu stig og tók átta fráköst en Pavel Ermolinskij er enn frá vegna meiðsla.

Sundsvall var lengst af með undirtökin í leiknum en oft munaði litlu á liðunum. Staðan í hálfleik var 50-48 en Sundsvall kláraði leikinn með því að vinna fjórða leikhluta með sjö stiga mun, 20-13.