Fréttaskýring: Hvað þarf að hafa í huga áður en haldið er utan í verslunarferð?

„Við könnum þetta bara handahófskennt,“ segir Kári Gunnlaugsson, yfirtollvörður eftirlitsdeildar Tollstjóra um tollaeftirlit í Leifsstöð. Nokkuð er um að fólk átti sig ekki á hvaða reglur gilda um hversu mikil verðmæti má hafa með sér tollfrjálst til landsins.

Fjöldi „stikkprufa“ ræðst þó einnig af því hvaðan fólk er að koma. Nú er til að mynda að renna upp tími „verslunarferða“, hvort heldur þær eru til borga í Bandaríkjunum eða Evrópu. „En það fer enginn í innkaupaferð til Noregs,“ bætir Kári við. „Helst að þá þurfi að líta eftir munntóbaki.“

Reglur tollsins er að finna á vefnum Tollur.is. Þar kemur fram að óheimilt sé að hafa með sér tollfrjálsan varning fyrir meira en 65 þúsund krónur. „En áfengi er ekki reiknað inn í þessa tölu,“ segir Kári. Þá má virði einstakra hluta ekki fara yfir 32.500 krónur.

Þegar tollverðir skoða farangur fólks sem kemur til landsins þá getur fólk þurft að sýna fram á að dýr varningur, svo sem tölvur og snjallsímar, sem það hefur með sér hafi í raun verið keyptur hér á landi og því búið að greiða af honum toll. Öðrum kosti er varan gerð upptæk og fólki gert að greiða af henni.

„Við ráðleggjum öllum að hafa með sér kvittanir fyrir dýrari hlutum sem þeir hafa með sér.“ Kári segir tollverði líka hafa leið til þess að sjá hvort iPhone-símar og sambærilegar græjur hafi í raun verið keyptar hér á landi. Apple haldi utan um skráningarnúmer hverrar græju og hvar hún hafi verið seld.

Því fylgir líka nokkur kostnaður að verða uppvís að smygli, því þá þarf að borga af hlutnum tvöfalt aðflutningsgjald og 15 prósenta álag ofan á þá upphæð. „Ef gjöldin eru bara virðisaukaskattur og hluturinn kostar 100 þúsund krónur, þá bætist við verð hlutarins tvisvar sinnum 25.500 krónur og svo 15 prósenta álag á þann 50 þúsund kall,“ segir Kári. Kostnaðurinn við hlutinn væri þar með kominn upp í 157.500 krónur. „Svo er þetta náttúrlega vesen því þetta er ekkert afgreitt á staðnum og fólk missir hlutinn í einhverja daga meðan þetta fer í gegn um kerfið.“

olikr@frettabladid.is