Þyrlan fer í hvítabjarnaleit á hádegi

Þyrla Landhelgisgæslunnar mun fara í loftið á hádegi til að leita að hvítabirni sem ítalskir ferðamenn töldu sig sjá í Húnaflóa í fyrradag. Þyrlan leitaði á stóru svæði í gær án árangurs en flogið var með strandlengjunni frá Skaga inn Húnafjörð, yfir Þingeyrarsand og fyrir Vatnsnes. Var síðan haldið áfram alveg vestur um og norður í Bjarnafjörð á Hornströndum.

Ekkert sást til dýrsins en hinsvegar fundu Gæslumenn öldumælisdufl sem hafði fyrir nokkru slitnað upp. Duflið hafði rekið frá Straumnesi, fyrir Horn og inn á Strandir. Duflið var tekið um borð og síðan flogið til eldsneytistöku á Ísafirði. Þyrlan lenti síðan í Reykjavík um klukkan hálfsex í gær.

Ítalskir ferðamenn gáfu sig fram við lögregluna á Stykkishólmi í gær og létu henni í té myndir. Lögreglan sagði í samtali við Vísi, að þótt erfitt væri að merkja hvítabjörninn á myndunum, væri ekkert útilokað.