Bjuggu til athvarf fyrir Erlend

Bóksalar í Eymundsson Kringlunni suður báru sigur úr býtum í framstillingarkeppni sem var haldin í tilefni af útkomu bókarinnar Reykjavíkurnætur eftir Arnald Indriðason. Þeir fá í sinn hlut gjafabréf upp á eitt hundrað þúsund krónur í Steikhúsinu.

„Þetta kom okkur skemmtilega á óvart því það voru margar flottar uppstillingar,“ segir Helga Gréta Kristjánsdóttir, verslunarstjóri í Eymundsson Kringlunni suður. Aðspurð segir hún að mjög skemmtilegt hafi verið að taka þátt í samkeppninni. „Við ákváðum strax að taka þann pól í hæðina að vera ekki með krimmaþema. Okkur grunaði að það yrði allsráðandi. Í staðinn ákváðum við að búa til smá athvarf fyrir Erlend.“

Spurð hvort mikill tími hafi farið í sigurframstillinguna segir Helga Gréta: „Nei, við erum svo dugleg og snögg. Þetta kom bara einn, tveir og þrír. Við erum vön að handfjatla bækur og getum gert alls konar listaverk úr þeim.“

Dómnefndin var skipuð fagfólki í útgáfu-, markaðs- og sölumálum. Í umsögn þeirra um bestu uppstillinguna sagði: „Frábær sviðsetning sem var bæði fagurfræðilega metnaðarfull og sýndi mikið hugvit og innsæi. Bóksalar í Eymundsson Kringlunni suður gengu lengst í að skapa Erlendar-andrúmsloft með hjálp vel valinna leikmuna. Þegar komið var í verslunina leið manni eins og Erlendur hefði setið í stólnum og lagt frá sér kaskeitið og kylfuna um stund. Maður gat næstum fundið fyrir nærveru hans.“ - fb