Forgangsakreinar Strætó

Nýlokið er evrópskri samgönguviku. Þar ræddu menn um samgöngumál, s.s. að hjóla, ganga og nota almenningssamgöngur. Í evrópskum borgum er mikið lagt upp úr því að almenningssamgöngur séu góðar, enda fyrir því löng hefð og ein meginforsenda skilvirkrar borgarumferðar. Margt jákvætt hefur verið unnið á undanförnum árum til að bæta almenningssamgöngur á höfuðborgarsvæðinu, s.s. með forgangsakreinum og bættu aðgengi að biðstöðvum. En betur má ef duga skal!

Sérstakur vinnuhópur hefur starfað hjá Strætó bs. sl. fimm ár. Hópurinn vinnur að því að bæta umhverfi fyrir farþega og leggja fram tillögur um hvað betur má fara til að greiða fyrir umferð strætisvagna. Forgangsakreinar fyrir strætisvagna hafa margsannað gildi sitt og vinnur hópurinn markvisst að fjölgun þeirra. Hafa ber þó í huga að þar sem almennar akreinar þvera forgangsakreinar við gatnamót þarf almenn umferð að sýna sérstaka aðgæslu, s.s. við rauða dregilinn á Miklubraut. Þar leynast varasamar slysagildrur þegar umferð frá Grensásvegi, Háaleitisbraut og Kringlu þvera forgangsakreinina við akstur inn á Miklubraut. Nokkur tjón hafa átt sér stað við þannig aðstæður og mikill fjöldi „næstum því slysa“. Því er full ástæða til að hvetja almenning til að sýna tillitssemi og aka varlega við forgangsakreinar Strætó!

Rétt er einnig að hvetja fulltrúa sveitarfélaganna í stjórn Strætó bs. til að taka höndum saman um að fjölga forgangsakreinum og slá þar með tvær flugur í einu höggi. Auk þess að auðvelda för strætisvagna, munu þær að sjálfsögðu hraða för sjúkra- og neyðarbíla á álagstímum, þegar almennar akreinar eru meira og minna stíflaðar vegna bílamergðar.