Það geta allir verið stoltir af því að leggja inn í Blóðbankann

Lífið er hverfult og ekkert okkar veit með vissu hvað morgundagurinn ber í skauti sér. Öll getum við lent í þeirri aðstöðu að þurfa á blóðgjöf að halda. Okkur finnst sjálfsagt að fá blóð ef svo ber undir og fæst okkar hugsa um hvað liggur að baki.

Á bak við hverja blóðgjöf er blóðgjafi sem hefur lagt leið sína í Blóðbankann eða blóðbankabílinn, gefið af sjálfum sér og tíma sínum til þess að tryggja að nóg blóð sé til þegar á þarf að halda. Það er ekkert sjálfsagt við það, en sem betur fer eru margir tilbúnir að gefa af sér með þessum hætti.

Blóðgjöf er oft nauðsynleg. Við ýmsar fyrir fram ákveðnar aðgerðir er nauðsynlegt að gefa blóð og ekki síður í eða eftir bráðar aðgerðir. Einstaklingar geta þurft blóðgjöf reglulega vegna sjúkdóma um lengri eða skemmri tíma og alltaf þarf að vera til nóg neyðarblóð sem grípa getur þurft til við slys eða bráðatilvik sem þarf að bregðast við strax.

Þúsundir blóðgjafa

Blóðbankinn þarf að meðaltali 70 blóðgjafa á dag til þess að viðhalda sínum lager. Á bak við þessar blóðgjafir standa á milli níu og tíu þúsund blóðgjafar sem leggja leið sína í bankann reglulega. Það er nauðsynlegt fyrir bankann að fá inn nýja einstaklinga því alltaf eru einhverjir sem því miður þurfa að hætta að gefa, oft vegna reglulegrar lyfjanotkunar, sjúkdóma eða heilsubrests. Blóðbankabíllinn er afar mikilvægur í öflun nýrra blóðgjafa og eru margir sem koma í fyrsta sinn með vinnufélögum eða vinum í bílinn. Bíllinn er á ferðinni á þriðjudögum og miðvikudögum og er hægt að fylgjast með ferðum hans á www.blodbankinn.is. Bíllinn fer á ýmsa staði; fyrir utan skóla og fyrirtæki, í Borgartún, Fjarðarkaup, Smáratorg, Selfoss, Reykjanesbæ og fleira mætti telja. Opið er mánudaga til fimmtudaga í Blóðbankanum Snorrabraut 60, 101 Reykjavík þar sem alltaf er hægt að koma, fræðast, skoða og fá mat á því hvort maður geti orðið blóðgjafi.

Við tökum vel á móti þér

Blóðbankinn á 59 ára afmæli í dag, 14. nóvember. Af því tilefni verða bakaðar vöfflur og boðið upp á skemmtilegar uppákomur yfir daginn. Það eru allir velkomnir í afmæliskaffi, en auðvitað ekki bara í dag heldur alla daga.

Starfsfólk og hjúkrunarfræðingar Blóðbankans taka alltaf vel á móti þér ef þú vilt kanna möguleika þína á því að verða virkur blóðgjafi.