Mengun vegna nýs Landsspítala við Hringbraut

Opið bréf til Guðbjarts Hannessonar velferðarráðherra, Svandísar Svavarsdóttur umhverfis- og auðlindaráðherra og Jóns Gnarr borgarstjóra.

Nú mun rísa nýr Landsspítali við Hringbraut, samkvæmt deiliskipulagstillögu sem nú er til meðferðar hjá Skipulags- og byggingarsviði Reykjavíkur. Nýbyggingin mun hafa í för með sér mikla aukningu bílaumferðar á stofnbrautum við spítalann. Það er óumdeilt að svo verði.

Íbúasamtök 3. hverfis hafa bent á grafalvarlega galla í umhverfisskýrslu deiliskipulagstillögunnar. Hljóð- og loftmengun er svo gróflega vanmetin að það jaðrar við að kalla megi skýrsluna fölsun. Hún metur ekki þætti sem munu skerða lífsgæði íbúa verulega til framtíðar og tekur ekki tillit til takmarkaðrar flutningsgetu Miklubrautar við Lönguhlíð.

Íbúasamtök 3. Hverfis, Hlíða, Holta og Norðurmýrar hafa frá stofnun sinni árið 2005 barist fyrir því að gildandi lög og reglugerðir er varða loftgæði og hljóðvist séu virtar af yfirvöldum. Því er ekki svo farið í dag. Reglugerðir eru brotnar og íbúar hverfisins búa við skert lífsgæði vegna mikillar svifryks- og hljóðmengunar enda þarf meirihluti höfuðborgarbúa að ferðast í gegnum hverfið til að sækja vinnu sína dag hvern og er hverfið sundurskorið af stórum umferðaræðum.

Íbúasamtök 3. hverfis lýsa yfir áhyggjum yfir því að fram sé komin tillaga frá hönnunaraðilum sem stuðlar að frekari brotum á lögum og reglugerðum og rýrir lýðheilsu íbúa í Hlíðum enn frekar.

Íbúasamtökin skora á ráðherra og borgarstjóra að taka á þessum þáttum sem allra fyrst, horfast í augu við raunveruleg umhverfisáhrif af tillögunni í þeirri mynd sem hún er núna og leysa umferðarmálin í kringum Nýjan Landspítala við Hringbraut.

Í því samhengi köllum við á svokallaða „stokkalausn" það er lagningu umferðarstokks á Hringbraut, frá Landspítala, austur fyrir Lönguhlíð og jafnvel allt að Grensás, sem órjúfanlegan hluta af framkvæmdum við Nýjan Landspítala við Hringbraut. Ný umferðarskýrsla frá borginni bendir einnig á þá lausn, en þar eð um er að ræða þjóðbraut í þéttbýli, þarf sameiginlegt átak ríkis og borgar að koma til.

Umhverfisáhrif Nýs Landsspítala við Hringbraut verða í brennidepli á aðalfundi samtakanna þriðjudaginn 6. nóvember, kl. 20 í Háteigsskóla.