Fólk í glæpagengjum fái ekki vopnaleyfi

Hverjum þeim sem er meðlimur eða í nánum tengslum við samtök sem teljast til skipulagðra glæpasamtaka verður synjað um skotvopnaleyfi, samkvæmt frumvarpi að nýjum vopnalögum. Ögmundur Jónasson innanríkisráðherra mælir fyrir frumvarpinu í næstu viku.

Samkvæmt greinargerð með því segir að fyrir liggi að hópar afbrotamanna hafi á síðustu misserum lagt áherslu á að komast yfir vopn.

„Lögreglan hefur upplýsingar [um] að skammbyssum hafi verið smyglað inn í landið og þá hefur umsóknum um innflutning á skammbyssum fjölgað nokkuð frá árinu 2008. Því er það mat lögreglunnar að tryggja þurfi örugga vörslu og meðhöndlun þessara vopna. Þessa þróun má að einhverju leyti rekja til tilkomu erlendra glæpahópa hingað til lands og er því ástæða til að óttast aukna vopnaeign og vopnaburð,“ segir í greinargerðinni.

Ögmundur segir að lögin eigi að gera það refsivert að þeir sem hafi ofbeldi gagnvart öðrum á stefnuskrá sinni fái vopn í hendur.

„Við erum í slíkum heimi að við þurfum að taka ógnarvöldum skipulagðra glæpahópa alvarlega og hljótum að bregðast við því í löggjöf. Jafnframt erum við að forðast eftir megni að ganga á rétt þeirra sem eru með skotvopn undir höndum í allt öðrum tilgangi, svo sem til skotíþrótta og veiða.“

Lagt er til að sjálfvirkir og hálfsjálfvirkir rifflar og skammbyssur verði áfram bönnuð og undanþáguheimildir verði þrengdar. Það er gert vegna þess að grunur er um að ákvæðin hafi verið misnotuð, einkum um hálfsjálfvirkar skammbyssur.

„Lítið hefur sést til þessara vopna í skotkeppnum og skotæfingasvæðum hér á landi. Svo virðist sem þessi skotvopn séu ekki keypt í þeim tilgangi að stunda skotfimi þrátt fyrir að leyfið fyrir skotvopninu sé fengið með vísan til skotíþrótta.“

Þá segir að þrátt fyrir að frekari þrengingar geti talist íþyngjandi fyrir fámennan hóp séu það smávægilegir hagsmunir þegar litið sé til almannahagsmuna.

kolbeinn@frettabladid.is