Tugmilljóna sektir vegna trassaskapar

Dagsektir eru nú lagðar á sex hús í Reykjavík samkvæmt yfirliti sem byggingarfulltrúinn í Reykjavík gerði fyrir skipulagsráð borgarinnar og var kynnt ráðinu á fundi á mánudag. Ákvörðun hefur verið tekin um beitingu dagsekta vegna þriggja húsa til viðbótar.

Dagsektirnar nema í dag tæplega 32 milljónum króna, samkvæmt útreikningi Fréttablaðsins miðað við upplýsingar úr yfirliti byggingarfulltrúans.

Páll Hjaltason, formaður skipulagsráðs Reykjavíkur, segir dagsektafyrirkomulagið hafa skilað tilætluðum árangri, þrátt fyrir að borgaryfirvöld hafi ekki gengið hart fram við innheimtu skulda. Hann tekur undir það að tölurnar séu háar og heildartalan hafi komið á óvart. Það sé hins vegar einfaldlega vegna þess að ástandið sé verra en það hefur löngum verið.

Páll segir að umburðarlyndi gagnvart húseignum í niðurníðslu hafi verið ríkjandi eftir hrun, eðlilega. Hin hliðin á peningnum séu almannahagsmunir; niðurnídd hús skemmi út frá sér og geti einfaldlega verið hættuleg, eins og dæmin sanni.

Eitt húsanna sem um ræðir er gamla borgarbókasafnið, Esjuberg, sem stendur við Þingholtsstræti 29a. Félagið Inn fjárfesting, sem er í eigu Ingunnar Wernersdóttur, á húsið og lóðina. Framkvæmdir þar hafa legið niðri í nokkur ár og var því ákveðið að leggja á dagsektir sem nú nema rúmum átta milljónum króna. Ingunn, lögfræðingur hennar og byggingarstjóri framkvæmdanna funduðu í ágúst síðastliðnum með byggingarfulltrúa borgarinnar og kom þar fram að framkvæmdir eigi að hefjast á ný á næstunni. Lögð verður fram tímaáætlun um framkvæmdirnar og verða dagsektirnar látnar falla niður þegar framkvæmdum lýkur.

Næstmestu sektirnar hafa verið lagðar á húsið við Skólavörðustíg 40, tæpar sjö milljónir króna. Framkvæmdir eru hins vegar hafnar þar og hefur húsið verið rifið, en til stendur að byggja þar nýtt og stærra hús.

Sektir voru lagðar á tvær lóðir við Langholtsveg í vor þar sem byggingarframkvæmdir hafa ekki verið kláraðar, en í báðum tilvikum var framkvæmdum hætt í október 2008. Samtals nema sektirnar nú 6,5 milljónum króna. Þá eru dagsektir á fjölbýlishúsi við Lindarvað vegna frágangs 1,4 milljónir króna.

Þá eru dagsektir á húsi við Bólstaðarhlíð rúmar 8,8 milljónir króna, en það er vegna óleyfðra breytinga sem gerðar voru.

- þeb / shá