Europris lokar verslunum sínum

Öllum starfsmönnum Europris Ísland hefur verið sagt upp störfum, en uppsagnarbréf barst til þeirra nú um mánaðamótin. Rekstri allra verslananna verður hætt að loknum rýmingarsölum sem hefjast í dag.

Matthías Sigurðsson, framkvæmdastjóri Europris, vildi ekki staðfesta að fyrirtækið hygðist hætta rekstri í samtali við Fréttablaðið í gærkvöldi. „Þetta mun skýrast á morgun [í dag]."

Nýlega var verslun Europris á Korputorgi lokað. Því er um lokun þriggja verslana til viðbótar að ræða. Í hverri þeirra starfa tíu til fimmtán starfsmenn, að því er næst verður komist.

Europris Holding AS er móðurfélag Europris verslana – bæði í Noregi og Íslandi. Höfuðstöðvar fyrirtækisins eru í Fredrikstad í Noregi. Verslanir þar í landi eru um 200 talsins en þær voru sex á Íslandi um tíma. - shá