Íslenska landsliðið hefur aldrei unnið tvo fyrstu leikina

Íslenska karlalandsliðið getur náð sögulegum árangri á Kýpur í kvöld þegar liðið mætir heimamönnum í öðrum leik sínum í undankeppni HM í Brasilíu 2014. Með sigri verður liðið með fullt hús eftir tvo leiki sem hefur aldrei gerst áður í sögu Íslands í undankeppnum HM og EM.

Þetta er fjórða undankeppnin sem íslenska landsliðið byrjar á sigri og í hin skiptin hefur íslenska liðið ekki fengið neitt út úr leik tvö.

Það voru liðin sex ár síðan íslenska landsliðið vann sinn fyrsta leik í undankeppni en það gerði liðið á Norður-Írlandi 2. september 2006 undir stjórn Eyjólfs Sverrissonar. Íslenska liðið skoraði þá þrjú mörk á fyrstu 38 mínútunum og vann 3-0 sigur. Fjórum dögum síðar komu Danir í heimsókn á Laugardalsvöllinn en öfugt við leikinn í Belfast þá voru úrslitin nánast ráðin eftir rúman hálftíma. Danir komust yfir eftir aðeins fimm mínútur, bættu við öðru marki á 33. mínútu og unnu að lokum með tveimur mörkum gegn engu.

Sigurinn á Norðmönnum í Laugardalnum kom líka eftir langa bið eftir sigri í fyrsta heimaleiknum en því hafði íslenska landsliðið ekki náð í 22 ár, eða síðan liðið vann Albaníu 2-0 í fyrsta leik sínum í undankeppni EM 1992. Íslenska liðið var líka á heimavelli í næsta leik í undankeppninni en sá leikur var reyndar spilaður þremur mánuðum síðar. Ísland tapaði þá fyrir Frökkum 1-2 eftir að hafa lent undir eftir aðeins tólf mínútur.

Ísland hefur aðeins einu sinni unnið sinn fyrsta leik í undankeppni HM en fyrir 28 árum vann liðið 1-0 sigur á Wales í fyrsta leik í undankeppni HM í Mexíkó 1986. Mánuði síðast mætti íslenska liðið á Hampden Park og varð að sætta sig við 0-3 tap.

Í öll þrjú skiptin hefur íslenska liðið því tapað eftir sigur í fyrsta leik og alltaf fengið á sig mark (eða jafnvel mörk) á fyrsta hálftímanum.

Íslenska liðið er þegar byrjað að útrýma leiðinlegum hefðum undir stjórn Svíans Lars Lagerbäck og hver veit nema strákarnir afnemi þessa hefð á Kýpur í kvöld.