Neyðarúrræði að sækja um yfirdráttarlán

Vinna þarf á uppsöfnuðum halla Heilbrigðisstofnunar Austurlands (HSA) og velferðarráðuneytinu ber að sjá til þess að stofnunin fjármagni ekki rekstur sinn með yfirdráttarlánum enda er slíkt ekki heimilt. Þetta kemur fram í skýrslu sem Ríkisendurskoðun sendi frá sér um HSA í gær.

Fram kemur í skýrslunni að uppsafnaður halli HSA sé 113 milljónir króna og skammtímaskuldir 163 milljónir, þar af sé yfirdráttur á bankareikningum 82 milljónir króna.

„Við sjáum verulega eftir þeim fjármunum sem fara í vaxtagjöld,“ segir Þórhallur Harðarson, starfandi forstjóri HSA, sem útskýrir að það hafi hins vegar reynst nauðsynlegt að taka yfirdráttarlán til að halda rekstrinum gangandi, borga reikninga og tryggja aðföng, þegar í ljós kom að fjárframlög ríkisins hefðu ekki nema rétt dugað fyrir launum. „Í þvinguðum leik þá var það neyðarúrræði hjá okkur að sækja um yfirdrátt,“ segir hann.

Þórhallur segir árið í fyrra hafa verið mjög erfitt og mestur hallinn á rekstrinum sé til kominn á því ári. Margir samverkandi þættir hafi gert það að verkum að reksturinn hafi farið fram úr fjárheimildum. Hann nefnir til dæmis nýja kjarasamninga, sem hafi verið bættir mjög seint á árinu og að þeirra mati ekki að fullu, verr hafi gengið að draga saman starfsemina en vonast var til og ofan í það hafi komið til ófyrirséður kostnaður.

Þá bendir Þórhallur enn fremur á að til hafi staðið að velferðarráðuneytið hefði milligöngu um það að fjármálaráðuneytið hjálpaði HSA út úr lausafjárvandræðunum svo að stofnunin gæti greitt niður skuldir sínar. „En það hefur enn ekki gengið eftir,“ segir hann.

Í skýrslu Ríkisendurskoðunar kemur fram að þær ellefu heilbrigðisstofnanir sem skoðaðar voru hafi lítið sem ekkert fjárhagslegt svigrúm til að bregðast við óvæntum atburðum. Einungis fimm þeirra hafi verið með jákvæðan höfuðstól um áramót – í öllum tilfellum óverulegan. Þá hafi fjórar af stofnununum ellefu þurft að grípa til þess ráðs að taka yfirdráttarlán í banka til að standa straum af rekstri sínum.

Ríkisendurskoðun beinir ábendingum til velferðarráðherra í skýrslu sinni og hvetur hann til að efla eftirlit með framkvæmd fjárlaga og tryggja að stofnanir fjármagni sig ekki með yfirdrætti. Ekki náðist í Guðbjart Hannesson velferðarráðherra vegna málsins í gær.

stigur@frettabladid.is