Hlutafé í IP Studium aukið

Hlutafé í IP Studium Reykjavík ehf., félagi í eigu Ingibjargar S. Pálmadóttur, var aukið um 138,5 milljónir króna þann 13. júlí síðastliðinn. Þá var hlutaféð aukið úr 321,5 milljónum króna í 460 milljónir króna, eða um rúmlega 40 prósent.

Samkvæmt tilkynningu til fyrirtækjaskráar ríkisskattstjóra var hækkunin að fullu greidd með peningum. IP Studium á beinan 12,5 prósent hlut í 365-miðlum, sem meðal annars eiga og reka Fréttablaðið, Stöð 2, Vísi.is og Bylgjuna. Auk þess á IP Studium félagið ML 102 ehf. sem á 25,8 prósent hlut í sama fyrirtæki.

IP Studium skilaði síðast ársreikningi fyrir árið 2008. Þá voru einu eignir félagsins fjórar fasteignir og krafa á tengt rekstrarfélag, 101 Hótel. Allar fasteignirnar hafa síðan verið seldar út úr félaginu og samkvæmt ársreikningi 101 Hótels fyrir árið 2010 hefur leiguskuld þess við IP Studium verið gefin eftir. Markaðurinn sendi fyrirspurnir vegna málsins til Ingibjargar en engin svör hafa borist við þeim. - þsj