Sjómenn vilja breytt lög um strandveiðar

Breyta ætti lögum um strandveiðar svo veiðidagar hitti ekki á tímabil þar sem fiskverð er lágt segir formaður smábátasjómanna. Þrátt fyrir viðræður náðist ekki samkomulag um að fresta strandveiðum þar til eftir verslunarmannahelgi.

Stjórnvöld ættu að tryggja að í framtíðinni hefjist strandveiðar í ágúst ekki dagana fyrir verslunarmannahelgi, segir Arthur Bogason, formaður Landssambands smábátaeigenda.

Mikil óánægja er meðal strandveiðimanna með að tímabil strandveiða skuli hefjast 1. ágúst, enda stórar fiskvinnslur lokaðar um helgina og því líklegt að verð á fiskmörkuðum verði lágt.

Arthur segir ljóst að stjórnvöld hafi engar heimildir til að bregðast við þetta árið, en rétt sé að taka málið til rækilegrar endurskoðunar fyrir næsta sumar og breyta reglunum svo veiðarnar hitti ekki á svo óheppilega daga.

„Við munum reyna að fá ráðuneytið í samvinnu við að gera þetta þannig úr garði að sem minnst hætta sé á verðföllum af þessu tagi,“ segir Arthur.

Strandveiðar fara fram fyrstu dagana í hverjum sumarmánuði, og hefjast því á morgun, 1. ágúst. Veiðarnar stöðvast þegar heildarafla er náð og klárast því yfirleitt á nokkrum dögum. Því geta strandveiðimenn ekki beðið með að halda til veiða, enda hætt við að þá verði lítið til skiptanna ef aðrir fara á sjó.

Arthur segir strandveiðimenn hafa rætt um að bindast samtökum um að róa ekki fyrr en eftir verslunarmannahelgi. „Ég veit að menn eru að tala saman, en ég hef ekki heyrt að það sé neitt samkomulag um það, og ósennilegt að samkomulag náist úr því sem komið er,“ segir Arthur.

Hann segir það huggun harmi gegn að mögulega verði fiskverðið á markaði ekki jafn lágt og menn hafi haldið. „Þetta breytir því ekki að þetta eru augljóslega ekki heppilegustu dagarnir til að róa á,“ segir Arthur.

Eins og fram kom í Fréttablaðinu nýverið hafa fjölmargir strandveiðimenn haft samband við sjávarútvegs- og landbúnaðarráðuneytið og óskað eftir því að ráðherra fresti strandveiðum þar til eftir helgi. Til þess hefur hann enga heimild samkvæmt lögunum. Eina úrræði ráðherra til að hafa slík áhrif væri því væntanlega að setja bráðabirgðalög, og nær útilokað er að það verði gert.

Ekki náðist í Steingrím J. Sigfússon, sjávarútvegs- og landbúnaðarráðherra vegna málsins í gær.

brjann@frettabladid.is