Ættum að framleiða okkar eigið eldsneyti

Efnafræðingurinn Surya Prakash segir að Ísland sé betur til þess fallið en nokkur önnur þjóð að verða sjálfu sér nægt um eldsneyti. Íslenskt fyrirtæki hefur uppi áform um að framleiða 80 milljón lítra af metanóli á ári.

„Íslendingar búa við slíkar kjöraðstæður að þeir geta hæglega orðið sjálfbærir með eldsneyti," segir Surya Prakash, prófessor í efnafræði við University of Southern California og forstjóri Locker-kolefnisstofnunarinnar.

„Ísland er betur til þess fallið að nota einungis endurnýtanlega orku en nokkur önnur þjóð," bætir hann við. „Þið hafið jarðvarmann, heita vatnið, stór landsvæði, eruð velmenntuð þjóð og fámenn svo það er allt til alls. Ég myndi segja það fullkomlega raunsætt ef Íslendingar settu sér það markmið að nota eingöngu endurnýtanlegt eldsneyti eftir tíu ár bæði fyrir bíla- og fiskiflotann. Vandinn við Ísland er hins vegar sá að regluverkið stendur í vegi fyrir því, eins og er, að þið getið látið af þessu verða."

Prakash er höfundur bókarinnar Metanólhagkerfið sem fjallar um eldsneyti framtíðarinnar. Hann er þeirrar skoðunar að mun fleiri en Íslendingar líti fram hjá þeim tækifærum sem auðlindirnar hafa upp á að bjóða. Slík yfirsjá, segir hann, valda því að mengun verður meiri og sjálfbærni minni. „Það ætti hver þjóð að stefna að því að vera sjálfbær um eldsneyti, sjáðu bara hvað er að gerast í Bandaríkjunum. Þar kostar kostar olíugallonið fjóra dollara en þegar búið er að skattleggja það kostar það átta. Ástæðan er sú að það kostar mikla fjármuni að verja olíuauðlindirnar í Mið-Austurlöndum."

Benedikt Stefánsson, framkvæmdastjóri viðskiptaþróunar Carbon Recycling International (CRI) sem rekur einu metanólverksmiðju landsins í Svartsengi við Grindavík, segir að núverandi reglugerðir geri ekki ráð fyrir að metanól fari yfir þrjú prósent í blönduðu eldsneyti. Ísland hefur þó skuldbundið sig til þess að ná því marki fyrir 2020 að 10 prósent af eldsneytiseyðslu landans verði endurnýtanlegt eldsneyti. Verið er að vinna að breytingum sem taka mið af því og bindur Benedikt miklar vonir við þær.

Hægt er að vinna fimm milljónir lítrar af metanóli á ári í verksmiðjunni í Svartsengi. „Við höfum svo verið að rannsaka möguleikann á því að framleiða á bilinu 40 til 80 milljón lítra, svona í fyrsta kasti, úr sorpi," segir hann. „Til viðbótar við það er svo hægt að framleiða miklu meira með rafmagni. Reyndar eru til staðar verkefni í orkugeiranum sem gætu gert okkur kleift að framleiða eldsneyti sem myndi anna allri eftirspurn." Eldsneytisþörf alls bílaflotans er um 350 milljón lítrar á ári.

jse@frettabladid.is