Margir misstu af hátíðadagskrá

Hnökrar urðu á hátíðadagskránni á Austurvelli í gærmorgun og hófust dagskrárliðir mun fyrr en auglýst hafði verið. Er þar um að kenna að guðsþjónustu í Dómkirkjunni lauk fyrr en áætlað var.

Eva Einarsdóttir, formaður þjóðhátíðarnefndar í Reykjavík, segist vera virkilega leið yfir uppákomunni. „Ég komst sjálf ekki til sætis,“ segir hún en dagskráin hélt áfram á undan áætlun svo margir misstu hreinlega af viðburðunum. Þá tókst ekki að samstilla sjónvarpsútsendingu frá athöfninni á vellinum eins og venja er.

„Það er forsætisráðuneytið í samstarfi við borgina sem sér um athöfnina og þannig hefur það verið undanfarin ár,“ segir Eva og ætlar að kanna hvað olli þessum hnökrum á dagskránni.

Að lokinni dagskrá á Austurvelli lagði skrúðgangan upp í kirkjugarðinn við Suðurgötu of snemma af stað. Þar var lagður blómsveigur á leiði Jóns Sigurðsonar forseta. Margir misstu af athöfninni þar.

„Fyrir mörgum er athöfnin í garðinum eitt það hátíðlegasta á þjóðhátíðardaginn,“ bendir Eva á og bætir við: „Athöfnin verður undir gjörgæslu á næsta ári.“- bþh / sjá síðu 8