Sameinast þarf um afnámsáætlun hafta

Stjórnmálaflokkarnir auk aðila vinnumarkaðarins verða að ná breiðri samstöðu um afnám gjaldeyrishafta. Eftir þessu kölluðu bæði Árni Páll Árnason og Ólöf Nordal, þingmenn Samfylkingar og Sjálfstæðisflokks, á fundi Samtaka atvinnulífsins um afnám hafta undir yfirskriftinni Brýnasta hagsmunamál Íslendinga, á Hilton Reykjavik Nordica í gær.

Árni Páll sagði stóra vandann vera að ekki væri einhugur um leiðina út úr höftunum og minnti á að slíkt stefnuleysi hefði á síðustu öld valdið 60 ára haftatímabili. Því hvatti hann til sameiningar um afnám haftanna og sagði mikilvægt að ekki mætti blása til pólitísks hanaslags vegna ófyrirséðra afleiðinga afnámsferlisins. Þá lagði hann áherslu á að verja þyrfti heimilin fyrir mögulegu tjóni vegna afnámsins.

Loks kallaði Árni eftir því að allir flokkar myndu skuldbinda sig til að standa við markmið um jöfnuð í ríkisfjármálum ekki seinna en 2014 og að Maastricht-skilyrðunum yrði náð sem allra fyrst til að búa í haginn fyrir afnám hafta.

Ólöf tók í sama streng og sagði það skyldu Alþingis að ná breiðri samstöðu um afnám haftanna. Hún sagði litla umræðu hafa farið fram um skaðsemi þeirra á þingi sem væri skrýtið þar sem ekkert eitt mál væri jafn mikilvægt nú um stundir. Hún tók einnig undir með Árna að verja þyrfti heimilin fyrir mögulegu gengisfalli krónunnar vegna afnámsins en velti upp þeirri spurningu hvort veikburða ríkisstjórnin væri fær um þessi verkefni.- mþl