Strekkiþörf og samskipti við kanínur skoðuð

Gestir og gangandi geta nú barið augum í Öskjuhlíð í Reykjavík „örinnsetningar“ nemenda á fyrsta ári í arkitektúr við Listaháskóla Íslands. Verkin eru í tilkynningu sögð afrakstur skoðunar og greiningar nemenda á mismunandi notum borgarbúa á Öskjuhlíðinni.

„Afrakstur þeirrar vinnu birtist nú í innsetningum sem nemendur hafa sjálfir smíðað og nota til að magna upp stemningu eða getu á þeim stöðum sem þeir eru að vinna með,“ segir í tilkynningu. Unnið var með upplifunarferli barna, samskipti kanína og manna, strekkiþörf hlaupara, leyndar lausagöngur hundaeigenda og trjáhús klifrarans. Verkin fá að standa í örfáa daga.- óká