Róbert: Ég er ekki sáttur við mína stöðu

Róbert Gunnarsson hefur undanfarin ár gegnt algjöru lykilhlutverki í íslenska landsliðinu í handbolta. Það mun hann sjálfsagt gera áfram en hann hefur þó fengið lítið að spila með félagsliði sínu, Rhein-Neckar Löwen, í Þýskalandi að undanförnu.

„Ég er auðvitað ekkert sáttur við sjálfan mig og mína stöðu. Maður vill helst spila 60 mínútur í hverjum einasta leik," segir Róbert.

„En ég vissi að ég myndi þurfa að deila mínútunum með öðrum þegar ég gekk til liðs við félagið á sínum tíma. Svo hefur þeim bara fækkað," segir hann og brosir. „Maður verður bara að taka því og læra af mótlætinu. Það þýðir ekkert annað en að halda áfram að æfa vel og vera tilbúinn þegar kallið kemur."

Öðruvísi á þýskuRóbert er í þeirri óvenjulegu stöðu að þjálfari hans hjá félagsliðinu er einnig landsliðsþjálfari hans. Hann segir að það skipti þó litlu sem engu máli.

„Ég kynntist þessu þegar ég var með Alfreð [Gíslason] á báðum stöðum líka. Þetta er vissulega skrýtið því félagsliðsþjálfarinn Guðmundur og landsliðsþjálfarinn Guðmundur er ekki sami maðurinn. Hann er öðruvísi á íslensku heldur en á þýsku og þetta tvennt er í raun alveg aðskilið."

Róbert segist þó ekki óttast að hann sé ekki í nógu góðu leikformi fyrir landsliðið en viðtalið var tekið áður en landsliðið hélt utan til Danmerkur þar sem það spilar á æfingamóti um helgina.

„Ég skil vel að það skuli vera einhverjar efasemdir um það en það verður þá bara að koma í ljós. Nú fáum við þrjá leiki í Danmörku til að fínpússa okkar leik og þá munu allir leikmenn sjá hvar þeir eru staddir. En það hjálpar mér eins og öðrum hversu lengi flestir okkar í landsliðinu hafa spilað saman. Ef maður ætti að passa inn í eitthvað lið þá væri það þetta. Ég mun einbeita mér að því jákvæða."

Sjálfur hefur Guðmundur ekki áhyggjur af því að Róbert sé ekki í nægilega góðu standi fyrir landsliðið. Hann sagði við Fréttablaðið í desember síðastliðnum að þrátt fyrir allt hafi Róbert fengið sínar mínútur. „Robbi er í fínu standi en það er við ramman reip að draga þegar maðurinn sem hann er að keppa við [Bjarte Myrhol] er að spila mjög vel," sagði Guðmundur.

Sama spurningamerkiðRóbert segir erfitt að meta stöðu liðsins þar til að EM hefst í Serbíu. „Þegar janúar hefst finnst mér alltaf vera þetta sama spurningamerki yfir liðinu," segir Róbert. „Æfingarnar ganga vel og menn leggja sig fram. Svo þegar út í alvöruna er komið sjá menn fyrst hvernig þeir standa."

Þess má svo geta að samningur Róberts við Rhein-Neckar Löwen rennur út í sumar. Hvað tekur við er óvíst en Róbert hefur ekki átt í viðræðum við önnur lið að undanförnu. „Það er ekkert í gangi eins og er og þannig verður það þangað til að mótinu lýkur í Serbíu. Menn vilja sem minnst hugsa um svona mál í miðju stórmóti í handbolta," segir Róbert.