Björgum mannslífum og bætum umhverfið

Nýverið var greint frá því í fréttum að Reykjavíkurborg og fleiri sveitarfélög á Stór-Reykjavíkursvæðinu hefðu gert samkomulag við íslenska ríkið þess efnis að ekki yrði efnt til neinna stórframkvæmda í samgöngumálum í Reykjavík næstu tíu árin.

Þessi ráðstöfun verður að teljast í meira lagi undarleg, því hér í Reykjavík og nágrenni býr stærstur hluti þjóðarinnar, hér er umferðin mest og hér er mest aðkallandi að hefja framkvæmdir til að greiða fyrir umferðinni. Á sama tíma og aðeins örlítið brot vegafjár fer til Reykjavíkur er fjármunum almennings sólundað í óarðbærar framkvæmdir á borð við Héðinsfjarðargöng og Vaðlaheiðargöng, en þau hin síðarnefndu stytta ferðatímann austur fyrir Akureyri um aðeins tíu mínútur.

Umferðartafir kosta

Þær tafir sem verða á háannatímum á helstu umferðaræðum Reykjavíkurborgar kosta samfélagið margar milljónir króna dag hvern. En hér kemur hvort tveggja til vinnutap og aukinn eldsneytiskostnaður, að ekki sé minnst á mengunina sem fylgir því þegar bifreiðar stöðva og taka af stað í sífellu. Tími er dýrmætur og er það allra hagur að honum sé ekki eytt í umferðarteppum.

Vinstrimeirihlutinn í borgarstjórn gætir fjarri því hagsmuna borgarbúa í þessum málaflokki heldur dregur algjörlega taum landsbyggðarþingmanna Samfylkingarinnar. Aukin fjárframlög til Strætó munu aldrei bæta fyrir þann skaða sem Samfylkingin hefur valdið í umferðarmálum Reykjavíkur. Almenningur hefur fyrir löngu kosið að nýta sér fjölskyldubílinn umfram aðra samgöngumáta.

Fólk hafi val

Við sjálfstæðismenn viljum að einstaklingurinn hafi val. Vinstrimenn vilja aftur á móti stjórna lífi samborgara sinna, þar á meðal hvernig þeir ferðast. Sósíalisma sinn setja þeir nú í búning borgarskipulagsfræði og umhverfisverndar, en sósíalistar hafa á öllum tímum haft lag á að fegra ásýnd hugmyndafræði sinnar. Undir niðri býr þó alltaf kalt og napurt stjórnlyndið.

Öryggi er síðan stærsti þátturinn í þessu þar sem mannslíf verða ekki metin til fjár. Mislæg gatnamót draga úr alvarlegum slysum, en langflest alvarleg umferðarslys á Stór- Reykjavíkursvæðinu verða á ljósastýrðum gatnamótum. Það er hagur allra landsmanna að mun hærra hlutfalli vegafjár verði varið til samgöngubóta í Reykjavík.

Höfundur býður sig fram í sjötta sæti í prófkjöri Sjálfstæðisflokksins í Reykjavík.