Íþróttasálfræðingur og markvarðaþjálfari starfa með landsliðinu

Ágúst Jóhannsson undirbýr nú íslenska landsliðið fyrir EM kvenna í handbolta í Serbíu í næsta mánuði og hefur fengið til liðs við sig bæði íþróttasálfræðing og markvarðaþjálfara.

Roland Valur Eradze, fyrrum landsliðsmarkvörður í handbolta, er kominn í þjálfarateymi íslenska landsliðsins en í dag var æfingahópur Íslands fyrir EM tilkynntur. Fjórir markverðir eru í þeim hópi.

Þá hefur Viðar Halldórsson, íþróttasálfræðingur, starfað með leikmannahópnum en Ágúst segir að hugarfar og liðsheild spili stórt hlutverk í árangri liðsins.

„Til þess að ná góðum úrslitum þurfa leikmenn að vera með rétt hugarfar og vel stemmdir. Við þurfum að átta okkur á því að liðsheildin er lykilatriði í öllum landsliðum," sagði Ágúst í samtali við Vísi í dag.

„Við höfum unnið mikið með hugarfar leikmanna og ég tel það mikilvægt. Við erum í mjög erfiðum riðli en engu að síður stefnum við auðvitað að því að komast áfram. Við höfum mikla trú á að við getum það."

Ísland er í riðli með Rúmeníu, Svartfjallalandi og Rússlandi en alls komast þrjú lið áfram úr hverjum riðli í milliriðlakeppnina.

„Við þjálfararnir höfum skoðað marga leiki hjá þessum liðum. Það liggur fyrir að allt eru þetta sterkar þjóðir en að sama skapa sér maður möguleika gegn hverri þjóð," sagði Ágúst.