Hundrað ára hús að gistiheimili

Félagið RR Hótel sem hefur hug á að kaupa eitt hundrað ára hús Félags bókagerðarmanna við hlið Þjóðleikhússins vill fá að að breyta eigninni í gistiheimili.

Í bréfi RR Hótels til skipulagsyfirvalda í Reykjavík er spurt hvort breyta mætti húsinu að innan auk þess að setja á það þakglugga á báðar súðir, tvennar svalir og breyta gluggum í dyr á norðurhlið hússins.

Í umsögn frá Húsafriðunarnefnd segir að ekki séu gerðar athugasemdir við breytingar innanhúss ef þær taki mið af upphaflegum frágangi. Eins leggur nefndin áherslu á að breytingar utanhúss taki mið af aldri og gerð hússins.

Skipulagsstjórinn í Reykjavík segir breytta notkun hússins samrýmast deiliskipulagi svæðisins. Hins vegar sé ekki heimilt að gera breytingar á ytra byrði hússins því það njóti verndar 20. aldar bygginga. Málið hefur enn ekki verið afgreitt.

Húsið á Hverfisgötu 21 er byggt árið 1912 eftir teikningum Steingríms Guðmundssonar og Finns Thorlacius arkitekts. Það er tvær hæðir auk riss og kjallara. Þar hafa löngum verið leigðir út salir undir veisluhald. Gert er ráð fyrir allt að níu gistirýmum eftir breytinguna.

RR Hótel rekur nú þegar gistihúsið Reykjavik Residence á Hverfisgötu 45. Þar var norska sendiráðið áður til húsa og einnig Söngskólinn í Reykjavík.- gar