Óvenju mörg manndrápsmál í fyrra

Óvenjumörg manndrápsmál, eða alls þrjú, voru til rannsóknar hjá lögreglunni á höfuðborgarsvæðinu í fyrra. Þetta kemur fram í ársskýrslu lögreglunnar sem birt var í gærkvöld. Tímabilið 2007-2010 voru framin samtals fjögur morð í umdæminu og árið í fyrra var því óvenjulegt að þessu leyti. Lögreglan segir þó að varast beri að horfa á sérstaka þróun í þessum efnum og rétt að hafa hugfast að í fyrra fækkaði ofbeldisbrotum á höfuðborgarsvæðinu.

Manndrápsmálin voru jafnframt mjög ólík, að sögn lögreglu. Í einu málinu var gerandinn úrskurðaður ósakhæfur. Sá er karl á þrítugsaldri, en hann var handtekinn við Landspítalann á vormánuðum. Maðurinn ók þangað, gaf sig fram við starfsfólk sjúkrahússins og vísaði á lík barnsmóður sinnar, sem var í farangursgeymslu bifreiðarinnar. Fólkið hafði áður verið á ferð í Heiðmörk og er talið að maðurinn hafi ráðið konunni þar bana. Hún var um tvítugt.

Í byrjun júlí var lögreglan kölluð til þegar ung kona frá Litháen leitaði aðhlynningar á Landspítalanum vegna blæðinga og kviðverkja. Læknar töldu fullvíst að konan væri nýbúin að fæða barn, en hún þvertók fyrir að hafa verið ófrísk. Í framhaldinu hófst strax rannsókn málsins, en haldið var á vinnustað konunnar, hótel í miðborginni. Þar fannst sveinbarn í ruslagámi. Barnið var látið, en talið er að það hafi fæðst lifandi og konan síðan komið því fyrir í gámnum.

Hálfum mánuði síðar var lögreglan aftur á vettvangi í miðborginni í kjölfar mjög alvarlegrar líkamsárásrar. Þar höfðu orðaskipti tveggja manna á veitingahúsi endað með því að annar stakk hinn í hálsinn með hnífi. Sá sem fyrir árásinni varð, karl á fimmtugsaldri, var fluttur á sjúkrahús með lífshættulega áverka. Hann lést svo af sárum sínum áður en mánuðurinn var úti.