Útlán Íbúðalánasjóðs hafa hrunið á milli ára

Útlán Íbúðalánasjóðs (ÍLS) hafa hrunið milli ára og skýrist það að mestu af ásókn fólks í óverðtryggð íbúðalán sem bankarnir bjóða upp á.

Í mánaðarskýrslu sjóðsins segir að heildarútlán námu rúmum milljarði króna í maí s.l. en þar af voru tæpar 900 milljónir króna vegna almennra lána. Til samanburðar námu almenn útlán í maí í fyrra tæpum 2,7 milljörðum króna.

Þá segir að alls hefur Íbúðalánasjóður veitt 488 almenn íbúðalán frá áramótum í samanburði við 950 lán á sama tímabili í fyrra.

Heildarvelta íbúðabréfa nam 58,2 milljörðum króna í maí samanborið við 18,6 milljarða í apríl 2012.

Greiðslur Íbúðalánasjóðs vegna húsbréfa og annarra skuldbindinga námu tæpum 670 milljónum króna í maí. Uppgreiðslur námu um 2,1 milljörðum króna.