Kosið um Vaðlaheiðargöng í dag

Greidd verða atkvæði í dag um hvort fjármálaráðherra fái heimild til að ábyrgjast 8,7 milljarða króna lán vegna Vaðlaheiðarganga. Umræðum um málið lauk í gær, en andstaða við það er í öllum flokkum.

Þrátt fyrir stíf fundahöld í gær hefur enn ekki náðst samkomulag um þinglok. Eins og Fréttablaðið greindi frá í gær hefur meðal annars verið rætt um að fresta afgreiðslu frumvarps um stjórnun fiskveiða, gegn því að frumvarp um veiðigjöld verði afgreitt.

Stjórnarandstaðan hefur kallað eftir því að veiðigjöldin verði lækkuð en stjórnarliðar eru ófúsir til þess. Milljarðarnir fimmtán, sem gert er ráð fyrir að gjöldin skili, hafa verið eyrnamerktir ýmsum framkvæmdum.

Fjölmörg frumvörp hafa orðið að lögum síðustu tvo daga. Þar má nefna frumvarp um barnalög, en samkvæmt því fá dómarar heimild til að dæma sameiginlega forsjá, en það ákvæði var í óþökk Ögmundar Jónassonar innanríkisráðherra.

Vaðlaheiðargöngin eru eitt þeirra mála sem stjórnin lagði áherslu á að klára. Það þykir gefa von um samkomulag að málið kemur til atkvæða í dag. Heimildarmenn Fréttablaðsins voru enda bjartsýnir á að samkomulag um þinglok næðist í dag.- kóp / sjá síðu 8