Sterkt efni getur hæglega verið banvænt

Hálft til eitt gramm af amfetamíni getur verið stórhættulegt börnum, til dæmis ef þau myndu gleypa það, að sögn Jakobs Kristinssonar, prófessors í eiturefnafræðum. Fréttablaðið spurði Jakob hvaða áhrif það gæti haft á fimm ára barn að innbyrða hálft til eitt gramm af amfetamíni.

„Það getur valdið alvarlegri eitrun í barninu,“ segir Jakob, en tekur fram að amfetamín og amfetamín sé ekki það sama. Styrkleikinn skipti miklu máli í þessu sambandi. Hins vegar þurfi ekki mikinn styrk til að valda barni alvarlegri eitrun. Sé amfetamínið aftur á móti mjög sterkt geti hálfs til eins gramms skammtur hreinlega verið banvænn. „Alveg leikandi,“ segir Jakob.