Keldan, Vísir og Kauphöllin setja á fót ávöxtunarleik

Keldan.is, Vísir.is og Kauphöllin hafa gengið frá samstarfssamningi um nýjan ávöxtunarleik, Leikinn, sem hýstur verður á keldan.is en innskráning mun fara fram á Vísir.is.

Áætlað er að leikurinn hefjist snemma í haust og mun hann verða þátttakendum opinn að kostnaðarlausu. Markmiðið er að veita öllum áhugasömum um fjármál tækifæri til að fræðast um virkni íslenska markaðarins sem og hvernig skuli nálgast hann með upplýstum hætti svo hann geti nýst sem hluti af áformum um ávöxtun á sparifé.

Í leiknum verður þátttakendum gefinn kostur á því að því að æfa sig í að halda utan um og ávaxta eignir sínar með viðskiptum í hlutabréfum og skuldabréfum skráðum á íslenska markaðnum; sjóðum og gjaldmiðlum, en einnig verður möguleiki á innlánum. Hver þátttakandi mun fá tiltekinn höfuðstól til að æfa sig í að halda utan um og reyna eftir fremsta megni að ávaxta spilapeninga sína sem best.

Í tengslum við leikinn verður boðið upp á fræðsluefni um markaðinn og virkni hans, sem og faglega ráðgjöf. Hægt verður að bera ávöxtun eignasafnsins saman við árangur annarra þátttakenda, keppa í liðakeppnum og verða veitt vegleg verðlaun fyrir bestu ávöxtunina, sem nánar verða kynnt þegar leikurinn verður settur formlega í loftið á Vísi.