Jónas Fr: RNA hafði rangt fyrir sér

„Hæstiréttur staðfesti nýlega dóm fjölskipaðs héraðsdóms þar sem felld var úr gildi stjórnvaldssekt Fjármálaeftirlitsins á hendur EA fjárfestingafélagi (áður MP banka hf.) fyrir brot á reglum um stórar áhættuskuldbindingar (mál 593/2011). Dómurinn er athyglisverður því hann sýnir að Rannsóknarnefnd Alþingis (RNA) var á villigötum í umfjöllun sinni um stórar áhættuskuldbindingar." Þetta segir Jónas Fr. Jónsson, fyrrverandi forstjóri Fjármálaeftirlitsins, í aðsendri grein í Morgunblaðinu í dag, þar sem hann fjallar um lög um stórar áhættuskuldbindingar fjarmálafyrirtækja.

Í greininni segir Jónas að RNA hafi verið á villigötum í túlkun sinni á lögum er varðar stórar áhættuskuldbindingar, málin séu ekki eins einföld og RNA hafi gefið í skyn í skýrslu sinni. „Í skýrslu RNA var gefið í skyn að hugtakið „yfirráð" ætti að túlka víðtækt. Var haldið fram að fella mætti samstarf þar undir og var sérstaklega vísað til reglna verðbréfaviðskiptalaga um yfirtökuskyldu. Slík nálgun stenst ekki af mörgum ástæðum, t.d. eru báðar reglurnar íþyngjandi sérreglur og verndarandlag þeirra ekki hið sama. Af niðurstöðu dómstóla er ljóst að RNA var á villigötum. Þannig segir orðrétt í héraðsdómi að „ekki sé unnt að leggja til grundvallar skilgreiningu 5. tölul. 3. mgr. 100. gr. laga nr. 108/2007 um verðbréfaviðskipti um yfirráð í skilningi a-liðar 2. gr. reglna nr. 216/2007."