Viðskipti innlent

Gætu fengið sex ára fangelsi - ákæran í heild sinni

Magnús Halldórsson skrifar
Hreiðar Már Sigurðsson, Sigurður Einarsson, Ólafur Ólafsson og Magnús Guðmundsson gætu átt yfir höfði sér allt að sex ára fangelsi verði þeir fundnir sekir um umboðssvik og markaðsmisnotkun en þeir hafa verið ákærðir af sérstökum saksóknara í Al-Thani málinu.

Þegar öll sund virtust lokuð fyrir íslensku bankanna, Glitni, Landsbankann og Kaupþing, bárust fréttir af því að sonur sóldánsins af Katar, Sheik Mohammed Bin Khalifa Al-Thani, hefði keypt ríflega fimm prósenta hlut í Kaupþingi fyrir 25,5 milljarða króna.

Margir alþjóðlegir bankar höfðu leitað til vellauðugra einstaklinga í Mið-Austurlöndum á þessum tíma, með það fyrir augum að fá þá til þess að leggja fjárvana fjármálastofnunum til peninga. Hreiðar Már Sigurðsson, forstjóri Kaupþings, fagnaði þessum kaupum sérstaklega í viðtali við Stöð 2.

En næstu dagar voru afdrifaríkir, og eru nú sem þrykktir í minni íslensku þjóðarinnar. Á örskömmum tíma féllu íslensku bankarnir eins og spilaborg, og var Kaupþing banki tekinn yfir af Fjármálaeftirlitinu 9. október 2008.

Um hálfu ári eftir að tilkynnt var um kaup Sheiksins á hlutnum í Kaupþingi, 13. mars 2009, kærði Fjármálaeftirlitið viðskiptin til embættis sérstaks saksóknara.

Eftir rúmlega ársrannsókn hjá sérstökum saksóknara á málefnum er tengdust Kaupþingi, voru yfirmenn Kaupþings handteknir og úrskurðaðir í gæsluvarðhald.

Ákært var í málinu 17. febrúar sl. en ekki var lokið við birta ákærðu ákæruna fyrr en í dag.

Málið verður svo þingfest í héraðsdómi 7. mars nk.


Tengdar fréttir

Ákært í Al-Thani málinu

Embætti sérstaks saksóknara hefur gefið út ákæru í hinu svokallaða Al-Thani máli, sem snýr að kaupum á 5 prósent hlut í Kaupþingi seinni part september mánaðar 2008, rúmum tveimur vikum fyrir hrun bankanna.

Ólafur: Ég lýsi mig saklausan

Ólafur Ólafsson, sem er einn þeirra sem ákærðir hafa verið í Al Thani málinu svokallaða, hefur sent frá sér yfirlýsingu. Hann hafnar öllum ásökunum sem á hann eru bornar og lýsir sig saklausan. Hann segir ákæruna koma sér á óvart.

Hreiðar Már, Sigurður, Magnús og Ólafur ákærðir

Hreiðar Már Sigurðsson, fyrrverandi forstjóri Kaupþings banka, Sigurður Einarsson, fyrrverandi stjórnarformaður bankans, Magnús Guðmundsson, fyrrverandi forstjóri Kaupþings í Lúxemborg og Ólafur Ólafsson, sem var annar stærsti hluthafi bankans í gegnum fyrirtæki sín, eru hinir ákærðu í Al-Thani málinu.

Hvað eru umboðssvik og hvað fellur undir markaðsmisnotkun?

Brotin sem þrír fyrrverandi stjórnendur Kaupþings og einn fyrrverandi hluthafi bankans eru ákærðir fyrir geta varðað allt að sex ára fangelsi ef sakir eru miklar. Þá geta þau tæknilega leitt til allt að níu ára fangelsis, verði þeir sakfelldir fyrir bæði umboðssvik og markaðsmisnotkun, en í almennum hegningarlögum er sérstökum hemild dómara til að bæta við helmingi refsingar ef mál er þannig vaxið að það mæli með því. Það gerist þó sjaldan.

Lögmaður Hreiðars Más: Ákæran er vonbrigði

Hörður Felix Harðarson, hrl., lögmaður Hreiðars Más Sigurðssonar, fyrrverandi forstjóra Kaupþings, segir það vera vonbrigði að embætti sérstaks saksóknara hafi ákveðið að gefa út ákæru eftir ítarlega rannsókn á Al-Thani málinu svokallaða.



Mest lesið


Fleiri fréttir

Sjá meira


×

Mest lesið