Ákærðir fyrir grófa árás í Breiðholti

Tveir karlmenn hafa verið ákærðir fyrir að hafa ráðist inn á heimili karlmanns á sjötugsaldri í efra Breiðholti aðfaranótt 6. júlí síðastliðinn, og halda honum í tæpar átta klukkustundir, beita hann ofbeldi og hóta honum líkamsmeiðingum og lífláti í því skyni að ná af honum verðmætum.

Samkvæmt ákæruskjali ýttu þeir manninum í stól í stofu íbúðarinnar og bundu hann við stólinn með límbandi. Annar mannanna beindi haglabyssu í eigu fórnarlambsins að höfði hans og skipaði honum að skrifa undir skjal þess efnis að hann skuldaði þeim fjármuni. Næst leystu þeir manninn og skipuðu honum að millifæra peninga á bankareikning þeirra í gegnum heimabanka en fórnarlambinu tókst ekki að tengjast Internetinu. Þá færðu þeir manninn inn á baðherbergi íbúðarinnar þar sem annar mannanna ýtti fórnarlambinu ofan í baðkar, batt hann á höndum og fótum með rafmagnssnúru sem hann festi við blöndunartæki, tróð tusku upp í munn hans og setti límband fyrir munninn.

Þriðji maðurinn starfaði með þeim

Þeir neyddu svo fórnarlambið til að gefa upp leyninúmer á debetkorti og ógnaði annar mannanna honum með tréstaf. Þá hótuðu þeir honum lífláti og líkamsmeiðingum ef hann léti lögreglu vita. Þá neyddu þeir manninn til að millifæra rúmar 450 þúsund krónur inn á reikning annars mannsins. þá afhentu mennirnir þriðja manninum, sem ekki er vitað hver er, 32" sjónvarp í eigu fórnarlambsins og höfðu á brott með sér 22" tölvuskjá, lítið kassettutæki, ullarteppi, seðlaveski með 10-15 þúsund krónum, strætómiðum og debetkorti, auk þess sem þeir söfnuðu saman ýmsum verðmætum í íbúð mannsins og gerðu tilraun til að hafa á brott með sér.

Eins og fram hefur komið í fjölmiðlum fóru vinnufélagar mannsins sem varð fyrir árásinni heim til hans, eftir að vinnudagur hófst. Það var ekki fyrr en þá að árásarmennirnir flúðu. Mennirnir hafa báðir setið í gæsluvarðhaldi frá því að þeir voru handteknir eða í um sex vikur.