Hedin: Hefur verið mjög erfiður morgun

Robert Hedin, landsliðsþjálfari Noregs, var heldur niðurlútur þegar norskir fjölmiðlamenn ræddu við hann á hóteli norska liðsins í Vrsac í Serbíu.

Noregur er úr leik á EM eftir að hafa tapað fyrir Króatíu í gær. Liðið vann Slóveníu í fyrstu umferð en það dugði ekki til þar sem Slóvenar unnu Íslendinga í gær en bæði lið voru með betri árangur í innbyrðisviðureignum Noregs, Slóveníu og Íslands.

„Þetta hefur verið mjög erfiður morgun," sagði Hedin sem er reyndar Svíi. „Við komum til baka á hótelið í gær, ræddum málin í rólegheitun og stemningin var vissulega mjög þung. En mönnum léttist brúnin eftir stutta stund."

Litlu mátti muna fyrir Noreg. Hefði liðið fengið einu marki minna á sig gegn Íslandi eða skorað eitt mark til viðbótar gegn Slóveníu hefði það dugað til að komast áfram.

„Það er það sem er svo svekkjandi í dag vegna þess að við áttum aldrei séns gegn Króatíu. En við erum á réttri leið og erum að taka framfaraskref, hægt og rólega. Við erum að eignast fleiri og fleiri handboltamenn og höfum það sem þarf til að fara alla leið."