Tvöfalt meiri álagning á bensín á Íslandi

Álagning olíufélaganna á bensínverð er tvöfalt meiri á Íslandi en í Svíþjóð og 30% meiri en í Danmörku. Þetta sagði Skúli Helgason, þingmaður Samfylkingarinnar, í útvarpsþættinum Reykjavík Síðdegis í dag.

Markaðsverð á bensíni hefur verið að lækka að undanförnu. Aðeins í maí féll verðið um 16% á heimsmarkaði. Lækkunin á Íslandi nam aðeins rúmum 4%. Það vantar því talsvert upp á að lækkunin skili sér til neytenda.

Á því eru ýmsar skýringar, m.a. hækkun dollarans og álagning ríkisins, en ekki síst álagning olíufélaganna sjálfra.

„Það er býsna mikill munur, svo ekki sé fastar að orði kveðið," segir Skúli um álagninguna á Íslandi miðað við erlendis.

Skúli kemst að þeirri niðurstöðu að hægt væri að lækka bensínverð á Íslandi um 15-20 krónur á lítra ef álagningin væri á pari við það sem þekkist annars staðar í skandinavíu.

Hann skorar á olíufélögin að „færa okkur nær því sem frændur okkar á norðurlöndunum búa við".