Oddný mun mæla fyrir fjárlagafrumvarpinu

Katrín Júlíusdóttir tekur við embætti fjármála- og efnahagsráðherra 1. október næstkomandi af Oddnýju Harðardóttur.

Jóhanna Sigurðardóttir, forsætisráðherra og formaður Samfylkingarinnar, tilkynnti þetta í ræðu á flokkstjórnarfundi Samfylkingarinnar í morgun. Oddný tók sæti í ríkisstjórn um áramótin þegar Katrín fór í fæðingarorlof. Þann 1. september verður lokið við að endurskipuleggja og fækka ráðuneytunum í átta. Þá verður Oddný fjármála- og efnahagsráðherra. Katrín tekur svo við af henni 1. október þegar búið verður að kynna fjárlög næsta árs.

„Ráðherraskipan Samfylkingarinnar verður að öðru leyti óbreytt og hið sama á við um ráðherraskipan samstarfsflokksins. Með þessu móti er tryggt að Oddný mun ljúka og mæla fyrir fjárlagafrumvarpi ríkisstjórnarinnar á Alþingi, en það verður tekið til umræðu fyrir miðjan næsta mánuð og hið sama á við um frumvarp til fjáraukalaga sem mælt verður fyrir síðar í september," sagði Jóhanna og tók fram að Oddný hefði staðið sig vel.

Jóhanna sagði ríkisstjórnina hafa þurft að takast á við vantasamt starf eftir hrun og náð árangri.

„Stoltust er ég þó af þeim árangri sem við höfum náð við að verja velferðarkerfið og lífskjör þeirra sem veikast stóðu þegar hrunið skall á. Fólkið sem aldrei tók þátt í gróðabralli bóluhagkerfisins en hefði án nokkurs vafa orðið harðast úti í afleiðingum hrunsins, ef hægrimenn hefðu verið við völd," sagði hún.

Þá fór Jóhanna yfir árangur ríkisstjórnarinnar og komandi kosningavetur í ræðu sinni.

„Afstaðan til aðildar að Evrópusambandinu verður örugglega eitt af stóru málum vetrarins og komandi kosninga. Þar hefur Samfylkingin algjöra sérstöðu. Flestir hinna flokkanna virðast treysta sér illa í umræðuna og vilja helst stöðva viðræðurnar fyrir kosningar. Áður en fólkið í landinu fær að sjá hvað út úr samningaviðræðunum kemur," sagði Jóhanna Sigurðardóttir.