Betri nýting bílastæða fæst með gjaldtöku

„Það eru skiptar skoðanir um þetta. En ég held að þetta muni frekar vera til góðs heldur ills." Þetta segir Karl Sigurðsson, bæjarfulltrúi Besta flokksins og formaður umhverfis- og samgöngunefndar. Gjaldskrá bílastæðasjóðs tók formlega breytingum í dag. Er nú mun dýrara að leggja í skammtímabílastæði en áður.

Karl var gestur í útvarpsþættinum Reykjavík síðdegis í dag. Hann ræddi þar við þáttastjórnendur um breytingarnar. Mikið hefur verið rætt um breytingarnar og óttast margir að verslun í miðbænum verði fyrir neikvæðum áhrifum af hækkuðu bílastæðagjaldi.

Hann segir að nýting bílastæða á þeim svæðum sem breytingarnar taki til hafi verið óásættanleg hingað til. Það hafi í raun verið ómögulegt fyrir fólk að finna bílastæði á þessum svæðum. „Margir gefast upp og fara frekar í Kringluna eða Smáralind," segir Karl. „Það er ekki gott fyrir miðbæinn."

Þá segir Karl að hækkun gjalds fyrir skammtímabílastæði sé gert í þeim tilgangi að nýta stæðin betur. Í staðinn verður einblínt á að bæta þjónustu í bílstæðahúsum en þau verða nú opin frá sjö á morgnana til miðnættis. „Bílastæðahúsin eru eftir sem áður góður valkostur fyrir þá sem vilja leggja í lengri tíma."

„Þetta er ekki pólitískt mál. Við erum að fylgja ákveðnum fræðum sem hafa sannað sig út um allan heim. Þessi fræði segja okkur að heppilega nýting er um 80 prósent. Það þýðir að eitt bílastæði ætti að vera laust af hverjum átta. Nýting á gjaldsvæði eitt var komin upp í 90 til 110 prósent.

Þá bendir Karl á að besta leiðin til að stjórna þessu sé með gjaldtöku.

Hægt er að hlusta á viðtalið við Karl í heild sinni hér fyrir ofan.