Slæmt ástand vega býður hættunni heim

Vegaöryggi og viðhald vega hefur verið vanræktur málaflokkur eftir hrun að mati forstjóra Umferðarstofu. Hún segir slysahætturnar stóraukast með lélegri vegum og brýnt sé að bregðast við því sem fyrst áður en illa fer.

Niðurskurður síðustu ára hefur orðið til þess að viðhald á vegum og framkvæmdir hafa dregist saman. Ástandið er víða slæmt og margir vegir illa farnir vegna lítils viðhalds. Þótt niðurskurðarkrafa sé á rekstri Vegagerðarinnar fyrir næsta ár verður hins vegar aukið fjármagn sett í viðhald. Dagný Jónsdóttir forstjóri Umferðarstofu segir hins vegar áhyggjuefni hversu litlu fjármagni hefur verið varið í viðhald og vegaöryggi síðustu ár. Slæmt ástand vega bjóði hættunni heim.

„Við sjáum til dæmis bara að með verra veggripi er hætta á að ökutæki séu að fara útaf eða velta, sérstaklega núna þegar veturinn er að koma. Í hálku verður ástandið enn verra þegar vegirnir eru lélegir. Og t.d. ef vegmerkingum fækkar þá fer vitund manna um staðsetningu á vegum að skerðast. Og einnig ökutækin, slit á þeim eykst og þá verður hættan meiri í umferðinni, bæði þegar ökutækin lenda í slysi og að þau lendi bara í slysi út af verra ásigkomulagi," segir Dagný.

"Með verra veggripi skapast sú hætta að ökutækin geta farið út af og í hálku versnar ástandið. Auk þess aukast slit á ökutækjum og þá verður hættan meiri í umferðinni."

Hún segir auðvelt fyrir stjórnvöld að skera niður í þessum málaflokki og hann hafi verið vanræktur eftir hrun. Og þetta sést skýrt á tölum. Framlög til viðhalds og þjónustu hafa verið skert um tæpa þrjá milljarða frá 2007.

„Viðhald verður dýrara seinna. Og ekki viljum við sjá til þess að slys fari að gerast vegna lélegs viðhalds. Þarna eru háar fjárveitingar og það er kannski auðvelt að setja pennastrik og skera þarna niður. En svo verður að hugsa til þess að þegar slys gerast sjáum við náttúrlega að það vantar pening til að slys gerist ekki," segir Dagný.