Bærinn eins og ein stór fjölskylda eftir bruna

„Þau bera sig bara vel en fengu náttúrulega sjokk þegar þetta gerðist. Núna eru þau búin að átta sig á þessu. Auðvitað eru þau skelkuð og önnur fjölskyldan búin að missa allt," segir Pálína Hermannsdóttir hjá Rauða Krossinum í Vestur Barðastrandarsýslu, en samtökin hafa aðstoðað fjölskyldu á Tálknafirði í kjölfar eldsvoða sem varð í fjölbýlishúsi í bænum í gærkvöldi.

Að sögn Pálínu felst aðstoðin meðal annars í því að útvega fólkinu föt, hreinlætisvörur og aðrar nauðsynjar auk þess að veita þeim sálrænan stuðning.

„Það er mikil samkennd í gangi. Fólk er duglegt að koma til okkar áhöldum, fatnaði og sængurfötum, svo eitthvað sé nefnt. Það eru allir boðnir og búnir og tilbúnir að rétta fram hjálparhönd. Þegar svona áfall verður þá verður bærinn bara eins og ein stór fjölskylda. Strax í gærkvöldi kom ótrúlegasta fólk til okkar og vildu hjálpa til. Við erum einnig búin að bjóða fjölskyldunum að koma í fatasöfnunina okkar á morgun," segir hún.

Í húsinu eru fjórar íbúðir og var fólk í þremur þeirra þegar eldurinn kom upp. Íbúð og innbú fjögurra manna fjölskyldu fór verst í brunanum og missti hún nær allt sitt. Sú fjölskylda og önnur fjögurra manna fjölskylda hafa fengið húsaskjól annarsvegar hjá vinafólki og hins vegar hjá atvinnuveitenda annarrar fjölskyldunnar. Ungur maður sem var í þriðju íbúðinni fékk húsaskjól á heimili foreldra sinna í bænum.

Allar íbúðirnar voru rýmdar vegna brunans í gærkvöldi og er unnið að því að reykræsta húsið.

Sjálfboðaliðar Rauða krossins á Tálknafirði brugðust við strax og ljóst var um brunann í gærkvöldi og hófu aðstoð við það fólk sem býr í húsinu. Sjálfboðaliðar Rauða krossins munu veita fólkinu áframhaldandi aðstoð í vikunni, hitta þolendur og veita þeim ráðgjöf og stuðning.